Addis Ababa:- Olunna gaancete giddo heedhe fonqolante sa”a hoogginori 12ki kifile rosaano 2014M.Dra tayxe rosaano ledo fonqolantanno gede gumulo sayinsoonni.
Rosu Ministeere qoqqowunna quchummate gashshooti rosu biiro sooreeyye ledo duucha yannara hasaawa assite addi addi gumulo barra sayissino.
Xawishshaho 2013M.Dra 12ki kifile fonqolo arramaate harinsho lainohunni xaadinose qarri nookkita Rosu Ministeere egensiissino.
Haammata qoqqowubbara xaadinori gumu aja nootanna Rosu Ministeere wole doorsha la”ate looso loossinotano xawishshu aana kulloonni.
Konnira, olunna gaancete giddo heedhe fonqolantino qooxeessubba hattono Yuniversite e’nanni gumi bixxille maareekkisiissinokki rosaanonna Mootimmate Yuniversitera ea dandiitinokki rosaano 2014M. Dra uynanniha goboomu 12ki kifile fonqolo tayxe rosaano ledo haaro ikkite fonqolantanno gede gumulo sa’ino.
Yuniversituwate ledo hasaawa assine ledde rosaano adhitanno gede sumiimmete iillinoonnitanna yuniversitubba ledde adhitanno rosaano mitte dawa nookkiha olu gaance korkaatinni gawajjantino qooxeessubbara taalo ikkino garinni beekkanno gede gumulo sayinsoonni.
Fonqolu guma xawisa lainohunni lame doychonni fonqolo uynoonni daafira xaadino qarra tirroonnita xawishshu aana egensiinsoonni.
Umi doychora fonqolantinori Amanyootu rosi aana xaadino qarra agurranna wole mitiimma xaaddinokkihura wolu rosu dani fonqolo ubbanno gede assate ikkadu korkaati nookkita xawisino.
Mootimmate Yuniversite rosaano adhitannore lainohunni albi dirrara qixxaawote rosi gedenaanni fonqolantannori ledo heewinsanni yannara huwata hoogano kalaqantinota Ministeere qummi assitino.
Albillichono togoo dani qarri kalaqamannokki gede assate jawaata looso loosate sumimmete iillinoonnita xawinsoonni.
Abrahaam Saamueel
Bakkalcho Dotteessa 13 , 2014 M.D
