Addis Ababa;- Dotteessu agani addi addi ayyaanna ayirrisantanno agana ikkasinni tenne balba’lite sagalete laalchi aana allaggichore karsite hirtanno daddalaano xawo fushshate dagoomu polisete ledo qinaawe loosa hasiissanno yino Sidaamu qoqqowi polisete komishiine komishinerchi Tesfaye Tungamohu.
Komishiner Tesfaye baxxinohunni Itophiyu pireesete uurrinsha ledo assino hasaawinni; kuni hee’noommo agani Yesuusi Kiristoosi ka’’ote ayyaananna Sidaamu daga diru soorro Fichee Cambalaallate ayyaana lede addi addiha amma’note ayyaanna ayirrinsanni agana ikkasinni tenne dago horonsidhe qoqqowoho sagalete laalchi aana allaggicho ikkinorenna fayyimma gawajjannore karsite hirtanno daddalaano heedhannota kayise; kuri bissa xawo fushshatenni hasiissanno qaafo adhate komishiine illacha tugge loossanni noota xawisino.
Hattono ayyaannate korkaatinni dagate millimmo balba’lite moortannorinna mulqidhannori heedhanno daafira dagoomu togoo assoote iillishshannorinni umonsa agadhanna qoropha hasiissannota huwachishinno. Daga dikkidhanno woyteno hidhitanno uduunnichi islanchimma seekkite buuxxe hidhitanno gede qaagiissino.
Komishiner Tesfaye ledotenni; dagoomu umisinna qooxeessu keeraanchimma agadhanno gede jaddote aamamannokki gede hedo kalaqate looso loonsoonnita kule; deerra deerranko afantanno dagoomu bissa ledo gutu ba’re qixxeessine konni alba kalaqantino labbanno jaddo kaima assatenni xaano kalaqantara dandiitanno qooxeessubba bande loosu giddora e’noonnita coyi’rino.
Qoqqowoho agannate albaanni sagalete uduunni aana hasiisannokkire karsite hirtanna polise dagoomu ledo qinaabbe assitino harunsonni seeru hundaanni hosiinse rosiissanno gumulo sayinsoonnita kayisinohu komishinerchu; xaano togoo assootira aamantannoreeti yine bandoonni qooxeessubbara harunso assinanni hee’noonnitano lede xawisino.
Albankeenni ayirrinsanni babbaxxitino amma’notenna budillaancho ayyaanna keerunni ayirrinsanni gede daga huluullissanno ikkito heedhuro mashalaqqe ga’labbote bissara aatenni halammensa leellishshanno gede amadisiise sokkasi saysino.
Qiddist Gezaheny
Bakkalcho Dotteessa 13 , 2014 M.D
