Addis Ababa:- Ammanaano qoortanno Magani hajajo qaagatenni mimmitu ledo gatona yaa hasiissannonsata Meggaabe Hadis Isheetu Alemaayyewuhu xawisi.
Meggaabe Hadis Isheetu Alemaayyewuhu Itophiyu Pireesete Uurrinsha ledo assino hasaawinni; tini yanna Isliminnunna Kiristinnu amma’no harunsaano qoorretenni sayissanni noo yanna ikkasenni ammanaano qoortanno Magani hajajo qaagatenni gatona yaa balaxisiisa hasiissannonsa.
Hiittenne amma’mo rosiishshi hattono wo’mante kalqerano ikko giddose noori gatona yaate gumaati; Kaaliiqi mannu ooso gatona yaa hoogoommero qole ayirrinyeho diillishannosankanni yaatenni miico maarotenni sa’’a hasiissannota coyi’rino.
Ammanaasincho ikkate yaa ammannoonni Magani hajajo adhate yaa ikkinohura hiittenne amma’no harunsaanchi miicinosiha gatona yaatenni kalaqaanchisi hajajo ayirrisa hasiissannosita Meggaabe Hadisi Isheetu xawisino.
Meggaabe Hadis Isheetu xawishshi garinni; gatona yaa lame horo afidhino. Miicino mancho gatona yaa sa’ino miico aguratenni koma hambe albillitte qarru kalaqamannokki gede assitannoho.
Gatona yine miico agura jawa horo nooseta xawisinohu Meggaabe Hadis Isheetu; gatona yaa meessaneetira horonsi’ra, iibbado mada hursine sa’ino miico gatona yaatenni meessaneete hasiissannokki xissonni gatisa ikkinota coyi’rino.
Gatona yaate tiro e’inonsakki mannooti keeshshino bassa kikkissanni haaro mada assitanno; fayyo coye kayinni madate widira soorritanno; konninnino umonsanna qooxeessinsara noo mannoota miiccanno; madiissitannono yino Meggaabe Hadis Isheetu Alemaayyewuhu.
Dadillu lamala lainohunni Meggaabe Hadis sokkasi sayisinoha ikkanna; ayyaanu aana Maganinsa sayisino xisso qaagganno ammanaasine yanna madiissitinonsare ikkitukkinni madasinni heeshsho uyno Kiristoosa qaagatenni gatona yitara hasiisanno yino.
Meggaabe Hadis Isheetu, anganke nooha techoonke barra garunni hee’rate hattono quqquxammetenna hexxotenni agadhineemmo ga’a hee’rate gatona yaate heeshshora higa hasiissannota amaalanno.
Maganu mannu ooso gatona yee gashshootesi eessinota xawisannohu Meggaabe Hadis Isheetu; ninkeno manna gatona yine minenke eessa hasiissannonke yaanni lede huwachishanno.
Miiconna bunshensa manna gawajjite surrensanni darantino egennoranna amaalera; heeshshonsanni darantino sagalenna uddano aatenni gatona yaa hasiissannota Meggaabe Hadis Isheetu xawisino.
Meggaabe Hadis Isheetu Qullaawu maxaafi aana ‘’Maganu Kiristoosinni gatona yino’nente gede mimmito’ne gatona yiiyye’’ yaanno qaali borreessaminota xawise; xissote lamalanni sutammesi qaangeemmo woyte gatona yaatenni millisa hasiissannotano xawisino.
Qiddist Gezaheny
Bakkalcho Dotteessa 13 , 2014 M.D
