Addis Ababa;- Cancishaanchu HWHT Itophiyaho baxxinohunnino Welqayit Xegedetenna Humeru daga aana kullikkinni keeshshinoonniha ikkiro ikkinnina barshetenna kakkachimmate danubba baala gumulinota Wolqayit Xegedenna Humeru qooxeessi yannate geeshshi layinki gashshaanchinna ga`labbote handaari sooreessi Koloneel Demmeqe Zewudu coyi’ri.
Gaamo mitto gotti wole heeshshi assatenni kadote gashshootiha assoote gumultanni keeshshinotano coyi`rino.
Koloneel Demmeqe baxxinohunni Itophiyu pireesete uurrinsha ledo assino hasaawinni xawisino garinni; tini gaamo gobbaydi horraano sokkonna maanifeesto amadde loossanni daggino wolqa ikkansanni billoonye amaddu gedensaanni daga sirchunni, gosatenni, amma’notenninna qooxeessunni babbaddanni mimmitu ledo itantanno gede loossanni keeshshitinnonna xaano hakkonne sufisiinsummokki yitanni olantanno walqaati.
HWHT Itophiya hunate umihunni Amaara huna hasiissanno yitanno hedo amadatenni baxxinohunnino Amaaru daga aana luphiima barshenna shetto iillishinota coyi’rino.
Tini gaamo faajjetenni Itophiya diigate Sioolete geeshshano ikkiro e’neemmo yitino wolqaati yinohu Koloneel Demmeqe; kunino jawa hunote wolqa ikkinota farco ikkino gede buuxisiisino.
HWHT Itophiyunnire qara baarigaara ikkitino gobbaydi wolquwa hajajamaanchonna hajote waajjuulluno horonsidhanni keeshshitino; xaano horonsidhanni afantanno yiino.
Wolqayiti daga 1972M.Dnni hanaffe HWHT ledo olantanni keeshshitino yinohu Koloneel Demmeqe; yannate baxxinohunni dhagge affinore jajjabba Wolqayitete mannoota barshetenni doddolinotanna Wolqayit Xegedete sircho hunate jaddo gumulinotano muli yanna kawa afantino maafu moogguwa farco ikkitinotano xawisino.
Ikkinohurano HWHT sa`u 40 dirrara gumulinnoha sircho hunate jadduwa kalqete dagoominna tuqu xaadooshshuwa bayichoho afamatenni la’aranna halaale huwattara hasiisanno yiino.
Sa’u 40 dirrara haammata Wolqayti daga mininsanni fulte wirro dihiggino; haammatu usuru mine tootayyaabbino; wolootu kayinni shettonna qarra adhitino. Batinyu mannihu reeshshuno hiikko madaaraminoro nafa dianfoonni.
HWHT ayino hedannokki garinni horophilu fooliishshi’rannowa lede mannoota maaxe fugatenninna maafe doddolatenni mannu aana assinannikkita luphiima barshe gumulanni keeshshino. Konninnino Humeru horophilu fooliishshi’rannowa calla 90 ale maafu moogguwa afantinotano xawisino.
HWHT Wolqayitete dagoomi aana sircho hunate doddolo gumulatenninna haammatuno darantanno gede assatenni alba dargete ledo olantino Tigrayete ilama basete gamba assino; qooxeessunniha dagate gambooshshi amanyoote soorrate su`ma soorrate geeshshano iillino yino.
Wolqayitete gumulaminohu sircho hunate doddoli luphiima bunshenninna xawo ikkinokki garinni gumulaminoha ikkasinni batinye daga fulte gobba gatate gobbaanni hiittoonni lubbantinoro, hiikko madaarantinoronna mamoote reyitinoro anfoonnikkitano coyi’rino.
Wole widoonni Wolqayitete daga ayimmate xa’mubba kayissanni keeshshitinota buuxisiisinohu Koloneel Demmeqe; tenne xa`mora kayinni dawaro reyonna darama ikkite keeshshino yino. Ikkinohurano xaano mootimma xa`mubbansara hasiissanno dawaro uyitara xa`mino.
Baxxinohunni tiiu gaado harunse Wolqayit Xegedete daga cancishaanchu HWHT anganni fulte wolaphitinoha ikkirono xaa geeshsha mootimmate baajeette gaammoonniikkiha ikkasinninna qooxeessahono noo safote latishshi cancishaanchu HWHT assootinni diigamasinni xaa yannara dagoomu qarru aana afamanno yino.
Baxxinohunni caabbichu owaante wo`munni wo`ma taxxi yaasenni xagisate owaantenna wole latishshu loossa luphiima garinni gufisantinotanna konninnino luphiima mannimmate, miinjunna dagoomitte gawajjubba iillitanni noota Koloneel Demmeqe coyi`rino.
Wolqayit Xegede Amaari ayimmate qolsiisaano komite gambisaancho ikkatenni hajonsa federeeshiinete amaale mine shiqishate 2007M.D Addis Ababa ha`ri yannara yannate HWHT luphiima massagaanonni amadame tootayyaawinoha ikkanna; 2008M.Dnni Gonderete hee`ranno mininni fugge amaddasira martino woyyaanete ga`labbote wolquwa ledo sharramatenni luphiima sharro assinota qaanganni.
Gonderete yuniverisite muli yanna giddo faajje assitinno xiinxallonni leellishshino garinni; Wolqayitete, Xegedetenna Xellemitete qooxeessubbara HWHT gumulinno barshenninna shettonni kainohunni mitte mittente maatewiinni xibbuunni 26.5% ikkannohu daramino; xibbuunni 19.5% fugame hiikka higinoro dianfoonni, hattono xibbuunni 29% lubbamino.
Abbebech Maatewoos
Bakkalcho Dotteessa 13 , 2014 M.D
