Addis Ababa;- Albankeenni daanni nooha tayxeha Sidaamu daga haaru diru soorro Fichee Cambalaallate ayyaananna wolootta ayyaannano iibbino garinni ayirrisate quchuma biifisatenna co’icha assate gaado hananfoonnita quchumu gashshooti egensiisi.
Hawaasi quchumu gashshooti kantiiwi kaa’laanchu pirofeeserichi Tsegaye Tukehu Itophiyu pireesete uurrinsha ledo bilbilunni assino keeshshonni xawisino garinni; Fichee Cambalaallate ayyaani kalaqamu hornyise qooxeessanna kalaqama garunni agara ikkasinni qoqqowu deerrinni ayyaana ayirrinsanniwa Hawaasi quchuma co’ichanna biifado assatenni gaado hananfoonni.
Ayyaanu baxillunniha, mimmitu ledo ayirrisammenna danchumma assatenni mannunnino sae kalaqama baala ayirrinsanniha ikkasinni tayxeno danchu amanyootinninna iibbino garinni ayirrinsate quchumu gashshooti deerrinni hasiissannota balaxote qixxaawo assinanni hee’noonnitano kaa’laanchu pirofeeserchi Tsegaye lede xawisino.
Kaaliiqi manchi beettira yee lubbosi sayse uynoha ikkasinni Faasiku ayyaanino jawa tiro afi’rinoha ikkinohura konne ayyaanano ayirrisate quchuma co’icha assatenni; danchu laooshshinna mimmitu ledo baxammenna ayirrisamme ayirrinsanni ayyaannaati yino.
Ayyaanna ayirrinseemmo woyteno wolqa noonsakki mannoota irkisatenninna kaa’latenni mitteenni hagiirrunni ayirrisateno quchumu gashshooti qixxaawo assinotano coyi’rino.
Islaamu amma’no harunsaanono bayi’ru Ramadaanu ayyaana ayirrisate qixxaabbanni noo agana ikkasinnino Ifxaaru amanyooteno quchumaho muli barri giddo iibbino garinni harinsannita kulino.
Hawaasi quchumi duuchanka hanqafinohanna baxillu quchuma ikkasinni albankeenni dagganni noore Fichee Cambalaallatenna wolootta ayyaannano quchumu baxillunniha ikkasi leellishanno garinni ayirrinsannita huwachishino.
Manchi beetto noonke wolqanni kaa’la dandiineemmo yinohu kaa’laanchu pirofeeserichi; wolqa noonsakki manna ayyaana calla agarre kaa’la ikkikkinni hiittenne yannarano quchumu gashshootinna teessaanono halammanni kaa’latenna heeshshonsa woyyaabbanno gede assate albinni roore hixamanyine loonseemmo yino.
Amadisiiseno kiristinnu amma’no harunsaano baalantera hawalle Faasiku ayyaanira keerunni iillishi’ne yee; ayyaanu mimmitu ledo baxamme mittimmatenni, hagiirrunni ayirrinseemmoha ikkonke yaanni dancha halchosi xawisino.
Amsaalu Felleqe
Bakkalcho Dotteessa 13 , 2014 M.D
