Hawaasa;- UNESCOte amammandannikki dona ikkite borreessantino Sidaamu Daga diru soorro Fichee Cambaalaallate Ayyaana ayirrisate balaxote qixxaawo gooffinota xawinsi.
Ayyanna ayirrinsanni gara lainohunni xawishsha uynohu Sidaamu Qoqqowi Woga, Turizimetenna Ispoortete Biiro Sooreessi Kalaa Jaggo Agenyohu xawisino garinni; Fichee Cambalaallate Ayyaani Sidaamunni sae kalqete jiro ikke UNESCO borreessamase xawise; kuni ayyaanino sa’u lame dirrara kalqenkera kalaqantino Koroonu Fayya korkaatinni Gudumaaleho ayirrikkinni sainota qaagiissino.
Ikkollana, dagoomu konni albintenni gede ayirrisanni sainohano ikkiro, mittimma Gudumaaleho ayirrisate amanyooti ikkikkinni gatinota sooreessu qummeessino.
Tayxe diro qole Sidaami giddono ikko gobbate deerrinni addi addi quchummara iibbadu garinni ayirrisate qoqqowu mootimma ayyaana qineessitanno gaamo tantanteenna millimillote giddora e’noonni yiinohu Kalaa Jaggo; Fichee Cambalaalla Sidaamu Dagara noose jajjabba amammadantannokki donna mereerinni qaranna mitte ikkaseno coyi’rino.
Jeefoteno biirote sooreessi, Fichee Cambalaalla tayxenni Lamalu diri albaanni Yuniskote borreessamase qaagiisse, konne ayyaana ayirrisateno ha’rinshubba noose gede kulino.
Kuri mereerinnino Buuru, Waasu, Cimeeyyetenni/geerrunni assinanni dagate huuccattonna gobbate dhibbu hee’riro hakko dhibba kaaliiqi hunanno gede eeggaataabbannonna daanno diri duuwunnihanna hexxonniha ikkanno gede halchitannonna giwaminohu araaramannoti balaxote ikkitubba giddo kullannire ikkitinota xawisino.
Addisu Adoola
Bakkalcho Dotteessa 13 , 2014 M.D
