Addis Ababa:- Itophiyu qarranna shettose beeqqa kaima assitino lame doogga sa’’a dandiitanno yino IFDR Xaphoomu ministirchi Dr Abiy Ahmedihu.
Xaphoomu ministirchi Dr Abiy Ahmedihu hooffayidi heeshshote deerrira afantanno 200 ikkitanno Addis Ababu quchumi teesaanora hurbaate beehate amanyoote harisino. Tenne yannara Xaphoomu ministirchi saysino sokkanni; Itophiyu ilate hiiqqammese; shettosenna qarrase lame beehate doogganni sa’’a dandiitanno yaanni coyi’rino.
Umi doogo budinke garinni lophinoommonna ronsoommo garinni qarra beeqqatenni shetto sa’’a xa’manno. Batinyootu qarranna shetto wolootu ledo beeqqatenni qarru gama calla xiiwe gawajjannokki gede kaa’litanno. Kuni rosichinke qarra beeqqatenni shetto sa’neemmo yannaati yino.
Xaphoomu ministirchi xawishshi garinni; layinki doogo kayinni qarra beeqqate. Qarra rumushshunni buqqinse hunate dandiisiissanno doogo umosi qarra beeqqate. Konni garinni qarra sa’’ate assinanni sharro beeqqano qarunni hasiissanno.
Afi’noommoha beenkeemmokkiha, qarra gatisate sharro beeqqineemmokkiha ikkiro kayinni qarru bati’rinotanna qarrunni wo’mitino gobba amande sufanke digattanno yino.
Konne gatisate kayinni harancho yanna harinshonni qarranke beeqqineemmore ikka hasiissanno. Seeda yanna rosichinkenni kayinni gutu ajuujanni mittimmatenni qarranke sharramate jawaata hasiissannonke. Konninnino oosonke togoo shetto afidhannonsakki gede assa agarantannonke yaanni coyi’rino. Kuri lamenkare qarra beeqqanna sharro beeqqate doogga gobbankera lowo geeshsha hasiissanno hajubba ikkansa xawisino.
Afi’noommore beehanna hurbaate beeha ninke Itophiyu dagara keeshshino balchoomankeeti. Baalunku wolqasi fajjitu bikkinni beehannaati konne deerra iillinoommohu yinohu Xaphoomu ministirchi; hurbaate beenkeemmo woyteno haaro budu rosicho ikkikkinni giddo keeshshinoommo hajo ikkase huwata hasiissannota qummeessino.
Konni ledo amadisiisaminohunni afa hasiissannonkeri; beeha meessineetiraati. Manchu wixi’nohaati mixxannohu. Beenkummo bikkinni techo la’’a hoongummorono ga’a oosonke aana le’neemmo yaanni coyi’rino.
Rosichinkenni huwata dandiinanninte gede dadillu mine nafa shii’rinohu dadillunni akkimalu garinni hiiqqamannokki gede irkisatenna sheshifachishatenni dadillisi shotanno gede qachu manni afi’rinore beehe sheshifachishannosi. Baadiyyeteno ikkiro Manchu waa goo’re xa’mi’reenna sagale woy ado uyne baati diyinanni. Konne hurbaate beehate rosichonke roorenkanni lossi’ra noonke yino. Techo qarraminohu ga’a kaa’lanna lubbo gatisa dandaanno. Tenne ammanne wo’manti Itophiyu daga afi’noommohu aaninni shiimare beenkanni batinye daga sheshifachisha agarantannonketa huwachishinno.
Kaa’lamme haammata dagara hurbaate beenkummoronna hindiiddonsa fiinummoro albankeenni noori Faasikunna Remedaani ayyaanna biiffinore assa dandiineemmo. Baxxinohunni Faasikunna Idi ayyaanna yannara lowo geeshsha rosaminoha sagale beehate budenke kaajjinshe sufa hasiissannota lede huwachishinno.
Konni danchummate loosinni lowo mannooti hagiirrunni sayissanno barrubba kalaqa dandiineemmo kaayyono noonke. Danchumma yanna agarte qoltanno daafira baalunku noonkehu aaninni beeqqine albankeenni noo ayyaanna keerunninna baxillunni sayisa hasiissanno yaanni sokkasi saysino.
Xaphoomu ministirchi Dr Abiy Ahmedihu assino hurbaate beehate amanyooti aana babbaxxitinore sagalete laalchonna gati mu’ro kaasate kaa’litannore laastikete uduunnichira kaansoonni mu’ro hooffayidi heeshshote deerri aana afantanno 200 mannootira beehino.
Qiddist Gezaheny
Bakkalcho Dotteessa 13 , 2014 M.D
