Addis Ababa:– Jawiidi rosu uurrinshuwa latishshu pirojektuwa gashshooti aana leeltannota jirote hafanfarre gargarate garunni massaga, gashshanna bandoonni illachi handaarinni gummaame ikkitanno gede dandiisiissanno harinsho diriirsinanni hee’noonnita Pilaanetenna Latishshu Ministrcho Dr Fitsum Asaffiti xawissu.
Jawiidi rosu uurrinshuwa latishshu pirojektuwa gashshooti aana assinanni hasaawi aana afantinoti Dr Fitsumi xawissino garinni; uurrinshuwa pirojektete gashshooti aana leelltannota jirote hafanfarre garunni massaga, gashshanna bandoonni illachu handaarinni gummaamma ikkitanno gede dandiisiissanno harinsho diriirsinanni hee’noonni.
Mootimmate jawiidi rosu uurrinshuwa rosu hala’lara sa’u dirrara luphiima qeecha amaddinoha ikkirono; investimente massangoonni harinsho aana luphiima foonqe leeltinota xawissino. Pilaanetenna Latishshu ministere, Rosu ministerenna hajo la’annonsa bissa ledo halamatenni latishshu massago pirojekte kaa’litannota baxxitino mootimmate investimente mixo biddissa qixxeessitinnota qummi assitinno.
Assinoonni xiinxallo leellishshanno garinni sa’u dirrara minantino Yuniversituwa safote latishshi xiinxallo qarri noonsare, minantinori garunni horote aana hossanni nookkitanna mootimma handaaraho fushshitino jiro hafanfartannota leellishshannota coyidhino.
Handaara massagganno poolise qixxeessa furchote gede assine adhinanni loosi mereerinni mitto ikkasi qummi assitinno. Yuniversituwa bandoonni handaarra aana illachishshe mixi’ra hasiissannonsata coyidhino.
Rosu ministere mootimmate Yuniversituwa sokkotenna illachu handaarinni tantantino; loosu jawiidi rosu uurrinshuwa investimente garunni massagate qara poolise tajenni horote aana hosiisatenni pirojektuwa amanyootensa amadisiisate kaa’litannota ammannoonni yitinno.
Biddissunnihu qaru illachi mootimmate jawiidi rosu handaarinni afi’nanni jironna ledote Investimente lophotenna latishshunni hasi’nanni rankenninna bikkinni soorratenna reekkisate illachishinoha ikkasi xawinsoonni. Gumulono Yuniversituwa uynoonninsa sokkonni gummaamma ikkitanno gede dandiissannota ikkase qummi assitinno.
Sa’u dirrara Itophiyaho batinye soorrote loossa harinsanni keeshshinoonnita kayisse; mootimmate Investimente massagaanonna gashshootu Federaalete mootimmate pirojektuwa gashshooti lallawi hanqafo kaajjite loosu giddora e’inota, lallawu mootimmatenna latishshu pirojektuwa hedo kalaqatenni kayisse pirojektuwa massagantannotanna loosonna yawonsa worroonnita coyidhino.
Rosu ministrchi pirofeeser Birhaanu Naggihu isi widoonni; soorrote harinsho giddo mootimmate jiro garunni amada hasiissannota huwachishinno. Ministere jawiidi rosu uurrinshuwa baxxino illachi handaari hee’reennansa rosiisatenni egenno tiro noo garinni halashshate loossanni noota coyi’rino.
Jawiidi rosu uurrinshuwa sa’u 20 dirra giddo gumullanni keeshshinoonnihu jawu halashshate loosi gummaamo ikkirono islanchimmate qarri hee’rasinni konne qarra co’isa hasiissanno.
Ministrchu xawishshi garinni; rosu amanyoote woyyeessatenni hananfe batinye loossa loonsanni hee’noonni. Fullanni fonqolo aa, Yuniversituwa umonsa dandiitanno gede assanna rosu islanchimma xe’ne taashshate looso illacha tunge gumullanni hee’noonni.
Rosu handaarinni islanchimma abbate egennote aana safantinore, heewisamaano, miinju qarra tirtanno ogeeyye kalaqa hasiissanno yino.
Qiddist Gezaheny
Bakkalcho Dotteessa 6, 2014 M.D
