Addis Ababa;- Gaashshootu harancho yanna giddo quchumaho addi addi Yuniversituwanni maassante fultinori 410 looso hooggino wedelliraati loosu bayicho uynohu.
Hawaasi quchumi kantiiwi kaa’laanchu pirofeesere Tseggaye Tukehu bayicho uyini yannara coyi’ranni; quchumaho 2014 baajeetete dirinni 25 kumi looso afidhinokki wedella badatenni loosu kaayyo injeessate loonsanni hee’noonni yino.
Aantete gashshootu bajeettete dirinni amadino mixo gumulsate hasiisannoha womaashshunna loosu bayicho injeessate sharro kaajjinshe sunfannita kantiiwu xawisino.
Loosu kaayyo kalanqoonninsa wedelli loosu giddora e’’ansara albaanni hasiisanno qajeelshanna womaashshu amadooshshi dhuka dhaabbachishate qajeelshano adhitinota K/P Tseggaye huwachishanno.
Loosu kaayyo kalanqoonninsa qansooti uminsannino sa’e haammataho loosu kaayyo kalaqqannore ikkitannota ammaneemmo yinohu Kantiiwu; kunino gobba Industirete latishshinni noose dhuka kaajjishshannore ikkansa xawisino.
Sidaamu qoqqowi pirezidaantichi amaalaanchi kalaa Tasammi Diimihu isi widoonni; Hawaasi quchumi gashshooti wedellaho looso kalaqate assanni noo sharro wolootaho dancha rosicho ikka dandiitannote yino.
Gashshootu kalaqinoti loosu kaayyo baxxinohunni quchumu giwrinni safote latishsha diriirsate loosi aana babbaxxitino laashshaano handaarra aana ikkasi guma roorenkanni halaalanya assanno yaatenni xawisino.
Wedellaho loosu kaayyo kalaqate gobbate deerrinni baxxino illacha uynoonni hajo ikkasenna Hawaasi quchumi tenne sokko garunni fulanni noota leellishanno yino kalaa Tasammi.
Hawaasi quchumi gashshooti kantiiwi Interpirayizootu latishshinna loosu kaayyo kalaqo biddishshi sooreessi kalaa Taarreqeny Daarimohuno isi widoonni; wedellu tenne kaayyo garunni horonsidhe jawa guma borressiisa agarantannonsata coyi’rino.
Qiddist Gezzaheny
Bakkalcho Dotteessa 6, 2014 M.D
