Addis Ababa;- Gobbankera muli yanna giddo uurrinsoonniti gobboomu amaalete komishiine gummaame ikkitanno gede hasaawissannonna dagate giddo huluullo kalaqqanno gobboomu hajubba aana eeli geeshsha dirine dagooma beeqqisiisino hasaawa assa hasiissanno yino keeru Ambaasaadderchinna Paan-Afrikaaniste rosiisaanchu Akaalu Abrihaamihu.
Rosiisaanchu Akaalu Itophiyu Pireesete uurrinsha ledo assino hasaawinni; Gobboomu amaalete komishiine safantanni heedheennanni lowo mitiimma kalaqantanni noota huwantanni hee’noommo yee; hiittenneno gobbate hajubba aana hasaambe sumuu yaate widira iilla hasiissannota huwachishinno.
Baalanti daganna dagoomi umi uminsa xa’monna hasatto heedhansara dandiitannota kayisannohu rosiisaanchunna keeru Ambaasaadderichi; hasaawu komishiineno baalante daganna dagoomi xa’mo aana hasaabbe sumuu assitanno hedo aana iilla hasiissannonsa yino.
Ledotenni horonsi’ra didandiinoommo ikkinnina baalanti daganna dagoomi budinsanni hiittenne dagoomu hajubba hasaambe tirate elto aamantinonke dagaati yee; Ikkollana techo poletiku mannootinna umonsa mannoomittete qoosso yekkeeramaanooti yitanno mannootinni gobba hembeelantanni afantanno; ikkirono ninke uminke balchooma horonsi’ne gobba e’ino mitiimmanni fushsha hasiissannonke yaanni qaagiissino.
Gobba giddonna gobbaanni heedhe keere booreessitanno hedo fincitanno bissa Itophiyu keere ikka hasidhannokkihura babbaxxinore kalaqqara dandiitannota qummi assinohu rosiisaanchu Akaalu; dagganno hedo aana ga’labbi yine hasaawa hasiissannota duu’re xawisino.
Konnira rooriidi qeecha amaddannoti daga ikkitino daafira gobba sufisiissanno hedo aana dagoomu amaalamenna torbe sumuu yaa dandaanno injoo kalaqa hasiissannota xawisino.
Konni garinni gobboomu amaalete komishiine gummaame assa dandiinannitanna aanteteno gobbate dancha coye haadhe dagganno yine hexxo assinannita rosiisaanchunna Keeru Amabaasaadderchi Akaalu Abrihaamihu lede qumi assino.
Qiddist Gezaheny
Bakkalcho Dotteessa 6, 2014 M.D
