Addis Ababa:- Tenne lamala giddo Amnesti Internaashinaalenna Human Rayitse mitteenni Itophiya lainohunni fushshitino rippoorte taje gamba assatenni hanaffe gumu geeshsha mittu ragira roorsitinnota ikkase IFDR gobbayidi hajo ministere qaalu sayisaanchi Ambaasaadder Diina Mufti xawisi.
Ambaasaadder Diina Itophiyu Pireesete Uurrinsha ledo assino hasaawinni; uurrinshuwa illete leeltannore batinye mashalaqquwanna ikkitubba garunni harunsitukkinni mittu ragira roorsatenni wole kayinni bushiishate rippoorte fushshitino.
Amnesti Internashinaalenna Human Rayitse Wachi mitteenni fushshitino rippoorte mitto raga roorsansanna sodhino uurrinshansa qaafissino rippoorte gara ikkitinokkita coyi’rinohu Ambaasaadder Diina; Amaaru qoqqowi mootimma tenne lainohunni fushshitino xawishshi gara ikkasi xawisino.
Mannoomittete qoosso xiiwo lainohunni qoqqowohono ikko federaalete mootimma hajo wole bissanni buuxate balanxe mixi’noonni garinni looso hananfe xiinxallote guma xawo assinanni hee’noonnita qummi assino.
Wole widoonni konni alba Halantino Mangistuwa mannoomittete qoosso komishiinenna Itophiyu widoonni hajo la’annonsa bissa mitteenni ikkatenni assitino xiinxallonni fushshitino rippoortenni; mootimma adhitannokki hajubba xiinxallotenni amadanturono xiinxallote guma kayinni mootimma adhitinota kayisino.
Konni deerrinni mootimma xawadimma, dancha fajjonna xa’mamaanchimmate qixxaabbino yanna giddo mittu widira calla roorsatenni layinkiha kayinni busheessatenni fultino rippoorte sodhinota ikkase huwachishinno.
Uurrinshuwa fushshitino rippoorte suwashshimmanna xawadimma nookkite, loonsoonni akati amadonna illachu hanafotenni kayise gara ikkinokkita AmbaasaadderIchu xawise; mootimmate widoonni mannoomittete qoosso xiiwo hajo aana addinni buuxxanno gaamo uurrisatenninna qaafo adhate harinsho sunfannita egensiisino.
Mannoomittete qoosso agara mootimmanniha mitto illacha ikkasinni tenne widoonni loosantanno loossa mootimma kaajjishshe suffannota Ambaasaadder Diina coyi’rino.
Mittu qooxeessinni mimmito labbanno mashalaqqenna taje gamba assatenni aleenni tenne xiinxallo assinummo yitanno uurrinshuwa horonsidhino tajenna mashalaqquwa mittu raginni calla la’’antinoti rippoorte mittu ragira roorsatenni co’itinokkita ikkase leellishshanno yino.
Amaaru qoqqowi Amnesti Internaashinaalenna Human Rayits Wachi mitteenni fushshitino rippoorte adhannokkitanna rippoortetenni shiqqino kissenna jaddaaleessimma uurrinshuwate poletiku shokkimma xawissannota ikkase xawisino.
Qiddist Gezaheny
Bakkalcho Dotteessa 6, 2014 M.D
