Addis Ababa;- Quchumu giwirinni handaarinni mitto ikkinohu qooxeessu agarooshshira tayxe dirinni 3 miliyoone haqqu mu’ro kaasate qixxeessinanni hee’noonnita Hawaasi quchumi gashshooti Giwirinnu biddishshi egensiisi.
Biddishshu sooreessi Kalaa Abebaayehu Laalimihu Itophiyu pireesete uurrinshara xawisino garinni; quchumaho 2014M.Dra qooxeessu agarooshshinna haanju harumi latishshira 3 miliyoone haqqu mu’ro kaasate qixxeessinoonni.
Babbaxxitino horo afidhinota lamu dani haqqu mu’ro kaasate qixxeessinanni hee’noonni yinohu sooreessu; umihunni mu’ro ikkitanna wolu garinni kayinni calehonna qooxeessu agarooshshi horo uytanno haqqu mu’ro ikkitinota xawisino.
Xaa yannara quchumu giddo la’nanni haqqe gummansa intannikkirenna caalehonna diilallote akatira calla hossannore ikkitanna konni gedensaanni kaansanniri kayinni roore duucha horora hossanno haqqu mu’ro ikka hasiissannota xawisino.
Quchumaho xaa yannara 50 kume ale ikkitannota gummate laalo mu’ro qixeessine kaasate mixi’ne loonsanni hee’noonniha ikkanna dubbu agarooshshira ikkitannota 3 miliyoone haqqu mu’ro qixxeessinanni hee’noonni. Kuri giddonni 1 bixxille 1 miliyoone quchumu giwirinnu biddishshi qixxeessanni nooha ikkanna gattinota kayinni Tuulate sinu quchumi qixxeessanni afamannotano kalaa Abebaayehu egensiisino.
Sooreessu xawishshi garinni; sai dirira Xaphoomu ministirchi Dr Abiy Ahmedihu Taaboori ilaala towaate ilaala garunni latinsanni gede worino faasho garinni Taaboori ilaala xaa yannara mannunna saadatenni kikkisamannokki gede agarooshshe assine amandeenna danchu garinni latanni noota coyi’rino.
Taaboori ilaala garunni latisate hananfoonni loossanni la’noonniha dancha rosichono Allamurinna Kiyyu Waatu ilaallara halashshate loonsanni hee’noonni; xaa yannarano Allamuri ilaala latisateno komite uurrinse loosu giddora e’noonnita xawinsoonni.
Quchumaho afantanno babbaxxitino hallanyunna mootimmate uurrinshuwara laalote gate kalaqate hende saihu 2013M. Dra hananfoonni loossannino rosu minna, fayyimmatenna mootimmate uurrinshuwara gumaamma loossa loonsoonniha ikkanna hallanyootuno noonsa baychi hala’linyi garinni laalote mu’ro kaasidhanno gede assinoonni.
Konninnino sai dirira kaansoonniti gummate laalo mu’ro agarranni garinni lattinoha ikkanna dubbunna qooxeessu agarooshshi horora kaansoonniri haqqu mu’ro kayinni xeenu anje korikaatinni xibbuunni 10% ikkitannoti ba’’ate dandiitinota kulinohu biddishshu sooreessi; konni gedensaanni kaansanniri haaro haqqu mu’ro moolte ba’annokki gede garunni awuuntanni latisate loonsannitano lede xawisino.
Amsaalu Felleqe
Bakkalcho Dotteessa 6, 2014 M.D
