Addis Ababa:– Yirgaalamete qinaabbino giwirinnu indusitire paarke gobbayidi dikkora sokkino laalchubbanni 4.4 miliyoone doolaare roortanno e“o afi`noonnita Sidaamu qoqqowi indusitirete paarkuwa latishshi korporeeshiine egensiissu.
Yirgaalamete qinaabbino giwirinnu industire paarke 11 sheeduwa amadde looso hanafunkunni mitto diro kiirsiissinoha ikkanna; xaa yannara onte kubbaaniyubba awukaatote zayte, malawu, adotenna bunu laalchubba aana bobbakke gobbayidi dikkora shiqishatenni eo afisiisate aana afantanno yinoonni.
Paarike lainohunni Itophiyu odoote owaante hasaawissinohu Sidaamu industirete paarikubba latishshi qaru loosu gumulsiisaanchi kalaa Memmiru Mokehu; paarke loosu giddorra e`unkunni hanafe xaa geeshsha 4.4 miliyoone doolaare ale eo afiisiissinota xawisino.
Eo paarikete giddo loossanno lame awukaatote zayite laashshaano kubbaaniyubbanni soyaantino laalchubbanni afi`noonniha ikkinotano coyi`rino.
Industirubba baatto loosidhe galtinorinna mittimmate loosu maamarra ledo dhaaddotenni amadisiisatenni bu`ra uduunnenna laalchu dikko xaadooshshe kalaqate dandiinoonnitanna paarkete giddo afantanno lame faafrikka ledo kalanqoonni dikkote xaadooshshinni 135 kume ale baatto loosidhe galtinori horaameeyye ikkansano xawisino.
Suffe paarke gobbayidinni e`anno laalchubba gobbate giddohunni riqiwate illacha assitannota xawise; waaga lendeennansa gobbate giddora e`anno bununna adote laalchubba gatisate loonsanni hee`noonnita buuxisino.
Yirgaalamete qinaabbino giwirinnu industire paarke giddo ikkado xintu latishshi noonsarenna 150 kubbaaniyubba amada dandiitanno sheedubba qixxeessine dureeyye agarranni hee`noonnitano qaru loosu gumulsiisaanchi coyi`rino.
Faafriikaho hasiissannori giwirinnu laalchubba hala`ladunni laashshantannohura; haammata mannu wolqanna ammansiisanno keeri noo qooxeessa ikkasinni dureeyye paarkete ledote loossa hanaffanno gedeno woshshatto shiqishino.
Sidaamu industire paarikuwate latishshi korporeeshiine hundaanni galtannoti yirgaalamete giwirinnu industire paarke maassante loosu giddora e`inohu Badheessa 4/2013M.D ikkasino qaanganni.
Abbebech Maatewoos
Bakkalcho Dotteessa 6, 2014 M.D
