Qoqqowu giddo noota dancha injo horonsire latisaano industire irkisatenni wo’mu ragi lopho maareekkisiisa hasiissannota Sidaamu Dagoomu Qoqqowu Mootimma Daddalunna Industirete Biiro xawissu.
Biiro Qoqowu Investimentete Komishiine ledo halamatenni “Itophiyu Laashsho” hattono “Yannillichu Daddalinna Investimentenke Wo’millu Jireenyinkera” yaanno umunni latisaano industirubba millimmote battala harissino.
Qoqqowu Layinki Pirezidaantichinna Rosu Biiro Sooreessi Kalaa Beyyene Baraasihu isi widoonni,latisaano industire handaari buxima ajishate assinanni sharrora jawa qeecha afidhinota xawise; loosu kalaqo widoonnino jawa qeecha fultanni leeltannota fanote hasaawa assi yannara coyrino.
Qoqqowu Mootimma worroonni ragi garinni loosu gidddora e’ino laashshaano irkisatenni; wodhote garinni loossannokkiri aana kayinni taashshote qaafo adhinannitano xawisino.
Qoqqowu Daddalunna Industirete Biiro Sooreessi Kalaa Ashshaagire Jemberehu isi widoonni, konni handaarinni qaroo’minohu massagote amuuraatinna wodho ikkado ikka investimentete lophora jawa qeecha afidhinota huwachiishino.
Giwirinnu aana irkirino miinjanke industirete widira shiikkate jawa sharro assinanni hee’noonnita kayise; lamu diri albaanni kalaqantino KOVID-19 taraawonna gobbankera kalaqantino gaance handaaru soorrora assinanni harinshora gufichcho kalaqqe sa’ninotano buuxisino.
Qoqqowinke hala’lado jiro afirinoha ikasinni; noonke jiro garunni horonsiratenninna latisatenni babbaxxino laalcho giddonni sa’ne baara widira sowate deerrinni albisaanchimmatenni shiqisha dandiineemmo yiino; Kalaa Ashshaagire.
2014M.D investimentetenna daddalu handaarra borro shiqqeenna hasaawa assinoonni.
Sidaamu umisi qoqqowo xintiri kawa laashshitanno industirubba handaarranni albinni woyyaabbino jiro maareekkantinotano buuxinsoonni.
Laashshitanno industire gummaame assate hajo la’annonsa bissa ledo qinaawe loosa hasiissannota battalate beeqqaano giddonni mitu mitu hedo wortino. Hasiissanno latishshuwa wonshatenni Qoqqowu Mootimma dureeyyete qotira uurritanno gede qaagiissitino.
Mito wote lifixa owaante aa hoogatenna konni handaarinni bobbakkino dureeyye tootayyeessa massagaanote widoonni leeltannohura tini harinsho taala noose yite; dureeyyeno loosu hoonge ajishate widoonni illacha tugge loosa hasiissannota kayissino.
Tini battala eeli geeshsha dirriteenna hasaambannita ikkitanna; deerru deerrunkunni afantanno hajo la’annonsa bissa mitiimma xinqite tirate illachinshe loonsannita dawarroonni.
Dagate ledo qinaawatenni hasiissanno xintu loossa loosatenni handaaraho illacha tunge loonsannitano raga worroonni. Handaarunni woyyaawino guma maareekkissiissinorira afansha uyinoonni.
Gaazeexu Odeessaanchinni
Bakkalcho Dotteessa 6, 2014 M.D
