Abrahaam Saamueel
Addisi Ababa: Cancishaanchu HWHT gaamo mannihimmate kaa`lora hodhishshu shiqqo aana qarra kalaqa hooggu geeshsha mootimma Tigirayete qoqqowira assitanno kaa`lo suffannota Danote bidhatto Loosu Massago Komishiine xawissino.
Danote bidhatto Loosu massago Komishiinehu Dagate xaadooshshi Dayrektoreete Dayrekterchi Kalaa Debbebe Zawude Itophiyu pireesete uurrinshara xawisinonte gede, Cancishaanchu HWAT Affaarete Abiaalaho fanino gaance korkaatinni haammata yannara doogote aana uurrite keeshshitino 20 gidenna addi addi udunne 1 nadaaje hoggobbino kaameella Tigiraye e`ino.
Togooti mannihimmate kaa`lo hogobbino kaameella e`anokki gede cancishaano gaamo qarra kalaqanni keeshshinota kulinohu Dayrekterichu, konni gedensaanni tini gaamo mannihimmate kaa`lo aana qarra kalaqa hoogiro ledote mannihimmate kaa`lo Tigirayete Qoqqowira shiqinshannita buuxisino.
Kalaa Debbebe xawishshi garinni, federaalete mootumma xaano kalqete dagoomiwiini shiqqanno kaa`lo Tigirayete qoqqowira sagalenna xagicho hodhissanno gede fajjo uyne mittimmatenni halamme loonsanni hee`noonnita kulino.
Mannihimmate kaa`lo shiqqo Cancishaancho gaamonni kainohunni doogo cufama hooggu geeshsha mootumma sagale, xagganna wole kaa`lono Tigirayete Qoqqowira e`anno gede assinani yiino.
Tigirayete Qoqqowira kaameellunninna rophilunni iillinshanniti mannihimmate kaa`lo qinaabbanno gede assate mootumma umise qeecha fultanni noo yiinohu Dayrekterichu Debbebe, baxxinohunni 2013 M.Dirinni Maaja agani kayse Sadaasu 2014 M.Diri geeshsha 51 kumenna 497 meetirike toone babbaxitino dani sagale kaa`lo hasiissanno dagara iillishate looso loonsonnita buuxisino.
Mannihimmate kaa`lo shiqishshannori 73 uurrinsha fajjo afidhe pirogiraamete gumulshiranna gashshootu loosira babbaxitino yanna giddo 1.2 biiliyone birra ale Tigirayete qoqqowira massitanno gede assinoonnita xawisino. Sagalete pirogiraamera kaa`lo hogowino rophili barru baala Maqale buubbanni nootano kulino.
Woleno Kalqete Qeyyi Masqalete uurrinsha xagganna mannihimmate kaa`lo hogobbe buubbanni nootano xawisino; xaphoomunni 2014 M.Diri Badheesu bocu agani geeshsha 337 kumi ali kg geeshshi xagga Tigirayete Qoqqowira hodhinsoonnita egensiisino.
Bakkalcho Badheessa 29, 2014
