Qiddist Gezaheny
Aantino yannanni Sidaamu qoqqowo turizimete iillonni albisaanchonna daa’’attote mereersha assate umihunni egennote aana safantino Istraateeje diriirsa hasiissannota qoqqowu woga turizimenna ispoortete biiro turizimete owaante ikkadimma buuxo dayirektoreete dayirekterchi kalaa Abbebe Marimohu xawisi.
Qoqqowoho noota daa’’attote base budillaancho hayyonni fushshine yannaasincho tantanonni uurrisate xiinxallo assinanni hee’noonnitano qummi assino.
Togo assate biiro IFDR turizimete ministerenna handaaru aana loossanno federaalete addi addi uurrinshuwa ledo halamatenni qoqqowu giddo noo base wirro haaroonsine yannaasincho assatenna haaro tantanonni uurrisate aana halamme loosate sumuu yitinnota kalaa Abbebe Itophiyu pireesete uurrinsha ledo assino hasaawinni egensiisino.
Baxxinohunni Sidaamu qoqqowira haammata kalaqamunna mannu loosinoti daa’’attote base afantannoha ikkirono tenne qooxeessubba latinse qoqqowu handaarunni afi’ranno e’’o lossate dandiisanno garinni illacha tunge loonsikkinni keeshshinoonnita kule; kuni qarri sidaami gede calla ikkikkinni gobbate garinnino illacha uynikkinni keeshshinoonni handaara ikkasi lede coyi’rino.
Xaphoomu ministrchi dokter Abiy Ahimedihu buxima hunate amadino mixo kaiminni gobbankehu turizimete handaari Muli yanna kawa afi’ranni noo illachinni hananfoonni millimmo hexxo uytannota ikkase kayisinohu kalaa Abbebe; hananfoonni loosi baalunku qooxeessira jawaate sufiha ikkiro muli yannanni turizimete handaarinni afi’nanni e’’o luphiima ikkitanno yee ammaneemmo yino.
Konni gobbaanni qoqqowoho luphiima kiiro amaddannori turizimete owaante uytanno uurrinshuwa afantannohu Hawaasi quchumira ikkanna hawaasi gobbaanni noo quchummanna woraddara afantannore daa’’atote basenna uurrinshuwa uytanno owaante deerri qooxeessu daganni bikkaminoha ikkasi kayisinohu dayirekterchu; aantete loosinkenni tini uurrinshuwa baalunku qooxeessi ledo taaltino owaante aa dandiitanno gede assate illachinshe loosate mixo amandoonnita kalaa Abbebe coyi’rino.
Bakkalcho Badheessa 29, 2014
