Amsaalu Felleqe
Adaama: Gobbate danchu gashshooti hala’lanno gede dandiissate tuqu xaadooshshuwa agarranninsa yawo garunni fula hasiissannonsata Itophiyu Dagate Imba Xebbaaqe Uurrinsha huwachishshu.
Uurrinsha danchu gashshooti gatamarshinna uurrinshate loossanna yawo lainohunni babbaxxitino tuqu xaadooshshuwa ogeeyyenna haja la’annonsa bissa ledo xaa geeshsha halante loossanni dagginonna albillichono qinaabbe loosate dandiissitanno hayyo aana Adaamu quchumira torbitino.
Itophiyu Dagate Imba Xebbaaqe uurrinsha qaru Imba Xebbaaqichi Dr Indaale Haylehu xawisino garinni; gobbankera baxxinohunni mootimmate uurrinshuwara leellannoha danchu gashshooti qarranna baincho assoote shaaramatenni, dancha amanyootenna dimokiraase gatamaratenni mooraanchimnanna muishsha gargarate tuqu xaadooshshuwa jawa qeecha afidhino yino.
Gobbankera seeda yannara rumuxxe keeshshinohu danchu gashshooti qarri, mooraanchimmanna muishshu, gashshootunni iillitanno miiconna labbannori shiima yanna giddo kalaqantinota ikkitukkinni seeda dirrara rosantanni dagginota xawisinohu Dr Indaale; togooha gobba hunanno assoote gargarateno ga’a gobba riqibbanno ilamara rosiinsanni ha’ra hasiissannota egensiisino.
Uurrinsha tuqu xaadooshshuwa mashalaqqete wolambinaati lallawi garunni loosu aana hosanni nooha ikkasi harunsatenna qorqorate yawo nooseha ikkanna taala hasiissannori gashshootu hajubba yannatenni qaafo adha hoongiro tuqu xaadooshshuwa dagate reqecci assite leellishanna egensiisa noonsatano xawinsoonni.
Konnirano tuqu xaadooshshuwa qara qeecha afidhinota kulinohu qaru Imba Xebbaaqichi; danchu gashshooti loossa bayi’riidi seeri aana worroonni garinni gumulamanna seru aliidimna agarama hasiissannotano coyi’rino.
Itophiyu Dagate Imba Xebbaaqe uurrinsha gobba massagganno mootimma dagate garunni owaantenna farco aa hoogguronna kakjacha mootimna ikkate so’rote giddora e’annoha ikkiro harinshose taashshidhanno gede qorqorate, harunsatenna amaalate loosono loossannote.
Uurrinsha duuchunku dagoomiwa iillateno dagoomu tuqu xaadooshshuwanna rosu tuqu xaadooshshi mereershuwa ledo halante loossanni afantanno.
Itophiyu Dagate Imba Xebbaaqe uurrinsha xaphoomunni 8 sinu uurrinshuwa nooseha ikkanna 20 dagoomu tuqu xaadooshshuwanna rosu tuqu xaadooshshu mereershuwa widoonni 22 babbaxxitino afuubbanni horonsidhe dagoomunniwa iillatenna gobbate giddo danchu gashshootinna dimokiraase hala’litannonna dagoomuno mashalaqqe afi’ratenna xaphooma bayi’riidi seeri aana worroonni qoossonsa agarantanno gede assate halante loossanni afantannotano uurrinshannihu qaru Imba Xebbaaqichi lede xawisino.
Bakkalcho Badheessa 29, 2014
