Yaareed Geetaachew
Hawaasa:- Quchumu giwirinni loossanna laalchimma lossate horonsi’nannihu dooramino wixi anje xaaddinota Hawaasi quchumi gashshooti Giwirinnu biddishshi egensiisino.
Biddishshu sooreessi kalaa Abebaayehu Laalimihu Itophiyu pireesete uurrinshara xawisino garinni; amandoonnihu laalchu dirinni quchumaho baxxinohunni dooraminohu badalate sirchinna bushshu madaabbari anje xaaddino.
Konni laalchu dirinni hasiisannohu 429 kuntaala dooramino wixa ikkanna; konni giddonni afi’noonnihu kayinni 160 kuntaala calla ikkasinni quchumu giwirinna hasiisanno garinni halashshatenna agarranni laalcho afi’rate ragaannino jawa qarra kalaqinota sooreessu xawisino.
Konnirano korkaatu kalqete gede xaadinohu ga’labbote qarri kaiminni gobboomu deerrinni baxxinohunni dooraminohu badalate sirchi anje xaaddino yinohu kalaa Abebaayehu; konni korkaatinnino quchumaho loosidhe galtinorira hasiisanno garinni iillishate dandiinoonnikkita egensiisino.
Baxxinohunnino Tuulate sinu quchumira afantanno 12 olluubbara loosidhe galtinorira afi’noonniha dooramino badalate sircho qixxeessidhino baatto hala’linyi garinni calla hasiisannonsa wixa tuqisate wo’naallanni hee’noonni yino.
Quchumaho roorenkanni gati mu’ro lashshinanni gede assinanni laalchimma lossate loonsanni hee’noonniha ikkanna; quchumaho hiikko qooxeessirano fano baatto loosantannonna wixunni diwantanno gede assinanni hee’noonnitano qummeessino.
Badalannihu dooramino wixi anje gobbate deerrinni kalaqantinota Ikkasenni baatto qatuntannokki gede babbaxxino doorsha horonsi’ra hasiissannota lede qaagiissino.
Quchumaho dooraminohu Badalate sirchi anje xaaddurono wolootta gati mu’ronna gidu sircho laashshidhannonna saadate ceattonnino bobbakkanno gede assinanni hee’noonni yino sooreessu kalaa Abebaayehu.
Bushshu madaabbari anjeno xaaddinota qummi assinohu sooreessu; konni ragaanni xaaddino anje tirateno loosidhe galtinori kalaqamu harishsha qixxeessitanni horonsidhanno gede assinanni hee’noonnita lede xawisino.
Bakkalcho Badheessa 29, 2014
