Abrahaam Saamueel
Addis Ababa:- Itophiyu hudete reqecci assitanno doogo ajishatenni sagaletenni umo dandiinanni doogo buuxisate illacha tuge loosanni noota Giwirinnu Ministere egensiissino. Itophiyu kalqete deerrinni hudete reqecco 116 nni 90ki deerrira dagginota riipoorte xawissanno.
Giwirinnunna Fayyimmate Ministeere wolootu kaa`laano uurrinsha ledo ikkite Aropu kiironni 2021 M.diro kalqete gobbuwa hudete reqecco deerri ripoorte faajje assinoonni. Battalate aana afaminohu Giwirinnu Ministeere Deeti Dr Mellese Mokkonninihu xawisinonte gede, Itophiyu hudete reqeccosi ajishate hattono sagaletenni umo dandaate loossanni no. Baxxinohunni, giwirinnu laalcho lossatenni sagalete umo dandaate looso loonsanni hee`nonni daafira hudete reqecco ajjara dandiitino.
Itophiyu Aropu kiironni 2000 M.Dirinni hanafe xaa geeshsha hudete reqeccosi deerri ajanni daynota caakkeesse, hala`ladu laalchi nookkiha sagaletenni umo dandiinannikkihura Giwirinnu Ministeere laalchonna laalchimma lossate illachiishshe loossanno yiino.
Hudete reqecconni fultanni dagginoti dagate kiiro xa lexxitanni noota xawisinohu Ministerchu Deetu, kuni danchu gumi afaminohu Itophiyunnita sagalete amanyoote woyyeessa dandiinoonnihu, mootumma deerru deerrunkunni wo`naalsha assitinohuraati yiino.
Fayyimmate Ministeerenni Amuwu, Qaaqqullunna Wedellu Fayyimmanna Sagalete Amanyooti Dayrekterchi Dr Meserete Zalaalemihu isi widoonni, Itophiyaho hudete reqeccose deerri sa`u dirranni keennooni garinni soorronna woyyimma heedhurono, xaano laalchonna laalchimma lossate widoonni jawa looso xa`manno.
Laalcho ledatenni, shiqqote ledo amadame noo qarra woyyeessate, onte diro woronni noo qaaqquulli reyo ajisha, onte diro woronni noo qaaqquullira sagalete shiqqo lossate ragaanninna gobbanketa sagalete amanyoote woyyeessate xaano kaajjado looso xa`manno yiino.
Sagaletenna sagalete amanyooti hajo mootummate calla tunge aggurrannita ikkitukkinni laalchunna laalchu shiqqo lainohunni Giwirinnu Ministeere jawa qeecha adha noota xawisino. Qansootu fayyimmanna sagalenna sagalete amanyoote woyyeessa hasiissannota Dayrekterichu huwachishino.
Bakkalcho Badheessa 29, 2014
