Abbebech Maatewoos
Addis Ababa:- Kalqoomunna Gobboomu yannate ikkitubba mereersino sasu diri mixo qixxeessitanni noota pilaanetenna latishshu minisitere egensiissu.
Pilaanetenna latishshu minisitire dieeti Dr Nemera Gebeyyehu egensiisino garinni; Ruusiyunna Yukireenete oli hattono mannu kalaqinonna kalaqamu danubbanna woloottano yannate ikkitubba hedote giddo worino gobboomu mixo qixxaabbanni no.
Ikkinohurano kalqoomu ikkitubbanna gobboomu hajubba keenatenni qixxeessinanni mixono sase dirra giddo loosantara dandiitannota ikkase Dr Nemera xawisino.
Mootimma aantete kalaqantara dandiitanno huluullubba qeelte gumaa`mate kaalitannosi gede mixote illaallishsha assate qixxaawo assitinotano coyi`rino.
2014 baajeettete diro mixote gumulsha keenni gedensaanni 10 diri latishshu mixo hundaanni 2015 – 2018 geeshsha loonsanni sasu diriti mereerimu diri mixo qixxaabbanni noota xawise; mixo sasu agani giddo jeefinse loosu giddora e`nannitano egensiisino.
Mixo illacha assitinohu babbaxxitino korkaatubbanni xiiwote giddora e`annore; mootimmate gobbayidi soorro e“o afisiissannonna luphiima loosu kaayyo kalaqqannore laashshote, giwirinnunniha, shiilotenna turiizimete handaarra ikkitinotano buuxisiisino.
Dagoomitte handaarrano mereerimu sani mixo giddo karsantannore ikkite baxxinohunnino olunninna kalaqote danubbanni jawa gawajjo illitinonsare rosunna fayyimmate handaarubbara illacha uyinanninsata huwachishino.
Gobbate giddohano ikko kalqoomu shetto piroojekitete fulo gashshooti aana luphiima xiiwo heedhannosita kule; safote latishshi ijaarshinna piroojekitete gumulshubbano mereerimu sani mixonni illaallishsha assinanninsata coyi`rino.
Itophiya Afriku jireenyi lawishshimma assate ajuuja amadino 10 diriha massagaancho latishshu mixo qixxaabbe 2013 M.D hanafe loosamanni nooha ikkanna; kooviid 19 taraawo kalqete daddalu amanyooti aana kalaqino shetto baajeetete dirira latishshu mixo loosi aana xiiwo iillishino yino.
Itophiyaho kalaqantino mannu anganni loosantinonna kalaqote danubbano dagoomittete, miinjunna polotiku xiiwubba ledantino korkaatubba ikkansa Dr Nemera coyi`rino.
Kuri korkaatubbanni 2013 baajeettete dirinni kalqete miinju lopho lowo geeshsha aja ikkannota hendoonni hedeweelchonni Itophiyu 6.3 xibbuunni lopho afi`ra dandiitanno yino.
Itophiyunniha miinja irkisate widoonni giwirinnunna shiilote gobbayidi daddalubba woyyaabbinoreeti yinohu ministir dieetu; mootimmannihu e“o gamba assate amanyootino danchaho yino. Ikkollana xaano miinjittenna dagoomittete qarrubba no yino.
Miinju hasi`noonni deerrinni lophannokki gede kooviid 19 taraawo ledotenni Ruusiyunna Yukireenete oli hattono gaancubbanna kalaqote danubba ledante Itophiyu aana xiiwo gashshitinotano coyi`rino.
Bakkalcho Badheessa 29, 2014
