Qiddist Gezaheny
Mittu Quchumi biifadonna heewisamaancho ikkanno gede qarunni keeru hasiisannota Itophiyu quchummate halamme boorde pirezidantichinna Hawaasi quchumi kantiibi kaa’laanchu pirofeesere Tsegaye Tukehu xawisi.
Hawaasi quchumano xa noo deerrinni aleenni Turizimete dooramaancho assate kaajjinshe loonsanni hee’noonnitano xawisino. Sa’u lamalara ‘’Teknoloojetenni irkisantino heeshsho owaatamaanote aa hasiissannonke’’
yaanno massagote qaalinni Itophiyu quchumma halamme battala Gonderete quchumira harinsoonniha ikkanna; halammete battala gobbanketi lophotenna dagate kiironni albisaano ikkitino quchumma miilla ikkitino battala ikkaseeti boordete pirezidaantichi Itophiyu pireesete uurrinsha ledo assino hasaawinni xawisinohu.
Xaa yannara Itophiyaho Addis Ababa lede 71 ale ikkitanno quchumma tenne ba’re miilla ikkansa qummi assinohu kaa’laanchu pirofeeserchi Tsegaye Tukehu; Gonderete harinsoonni battala aana haammata quchumma rosichonsa shiqishshino; halammete ba’rehu qaru illachino quchumma mimmitinsawiinni rosicho soorridhanno gede hende qixxeessinoonnita ikkase boordete pirezidaantichi lede xawisino.
kantiiwu Tsegaye Tukehu xawishshi garinni; sa’u Sasenna Shoole dirrara quchummate foreme gobba keeshshitino ga’labbote akati korkaatinni harinsikkinni keeshshitinota kule, sa’u lamalara Gonderete harinsoonni foremenni batinye roso soorri’noommo ; wole yannarano togoo ba’re wolootu quchummara sunfe harinsanni yino.
Kaa’laanchu pirofeeserchi amadisiise, Turizimete millimmonni albisaancho ikkinohu Hawaasi quchumi muli yannanni qoqqowohono ikko quchumaho ayirrinsanni fichee Cambalaallate ayyaanira baxxino garinni qixxaawo assanni afamannota lede kayisino.
Amadisiiseno quchumaho luphi yite leeltannota waagu lexxo ajishatenna dagoomu heeshsho irkisate quchumaho Sambatu dikko halashshate, laashshaano laalchonsa halashshitanno injoo kalaqatenna babbaxxitinota Teknoloojetenni irkisantino millimmo hananfoonnita qummeessino.
Bakkalcho Badheessa 29, 2014
