Qiddist Gezaheny
HIV vayrese amatewiinni qaaqqoho sa’annokki gede gobbate deerrinni sa’u 20 dirrara loonsanni keeshshinoonnita fayyimmate ministerenni afi’noonni mashalaqqe kultanno. Tenne yanna giddo gobbankera HIV amatewiinni qaaqqoho taraawate qarunni kora ikkinohu dagoomu huwanyootu anje ikkase buuxa dandiinoonni. Konninnino yanna yannatenni dhibbu taraawo bikki hala’lanni dayinota handaaru ogeeyye xawissanno.
IFDR Fayyimmate agarooshshi ministere amuwunna qaaqquullu fayyimma dayirektoreete amatenni qaaqqoho HIV taraawo gargarooshshi teknikete amaalaancho Dr Zebidaaru Zewdeti xawissino garinni; Xaa yannara gobbate garinni HIV buuxo assi’rino amuwi mereerinni 19 kume 817 ale ikkannori Vayiresete ledo hee’rannoha ikkanna amatenni qaaqqoho HIV Vayirese taraawono mereerimunni xibbuunni 14.9 anga ikkitannota assinoonni xiinxallo leellishshanno.
Konni daafira ministere aantino yannanni amatenni qaaqqoho HIV taraawo ajishatenna 2030nni co’o assine gatisate illachishshe loossanni afantannota kultannoti Dr Zebidaaru dhibbu amatenni qaaqqoho taraawannokki gede assa hasiissanno qoropho xawissanni;-
- Amuwu yanna yannatenni fayyimmansa buuxo assi’ra hasiissanno
- Dhibbu afaminsaha ikkiro mixotenni godowa
- Vayiresete ledo hee’ranno amuwi adha hasiissanno xagga horonsi’ranna godowii hee’noonni yannara HIV qaaqqu widira taraawannokki gede adhinanni xagga garunni adha
- Ilate gedensaannino dhibbu qaaqqoho taraawannokki gede hasiissanno qoropho assa hasiissannota huwachishshanno.
Bakkalcho Badheessa 22/ 2014
