Abbebech Maatewoos
Addis Ababa:- Daga bayi’riidi Itophiyu haaroo`mate kofatto ijaarshira assitanni noo kaa`lo ijaarshu jeefisama geeshsha kaajjishshe sufa noonsata woshshatto shiqqu. Sa’u 11 dirrara kofattote ijaarshira dagatewiinni 16.4 bIiliyoone birra kaa`lo gamba assinoonnita xawinsoonni.
Itophiyu Biheeraawe baanke gashshaanchi Dr Yinnaager Dese; bayi’riidi Itophiyu haaroo`mate kofatto gobboomu boondete hiro lamala faajje assinanna xawisino garinni; Itophiyu daga sa’u 11 dirrara kofattote assitanni keeshshitino kaa`lo ijaarshu jeefisama geeshsha kaajjishe sufa hasiissannonsa.
Bayi’riidi Itophiyu haaroo`mate kofatto gobboomu deerrinni boonde hirate lamala millimillo qara hende daga konni albaanni boondete hironni, baraarshunninna babbaxxino garinni kofattote ijaarshira assitanni keeshshitino kaa`lo kaajjishshe suffara dandiissate ikkinota coyi`rinohu Dr Yinnaageri; daga haaroo`mate kofattora assitanni noo kaa`lo xaano kaajjishshe suffara woshshattosi shiqishatenni millimillo hanafisiisino.
Bayi’riidi Itophiyu haaroo`mate kofatto qineessaancho borro mine layinki qara dayireekiterchi kalaa Taagel Qennubbih isi widoonni; baatto loosidhe galtinorinna saada ce’annori xaa geeshsha bayi’riidi haaroo`mate kofatto ijaarshira wolqansanni assitino kaa`lo woxunni soorriniro 100 biiliyoone ale ikkannota xawisino.
Kalaa Taageli baatto loossidhe galtinorinna saada ce`annori woxunni irkisate ledotenni wolqansanni diru tuqa laayyote loossa gumulatenni qeechinsa kaa`lo assitinota xawisino.
Sa’u 11 dirrara kofattote ijaarshira dagatewiinni 16.4 biliyoone birra kaa`lo gamba assinoonnita xawise; babbaxxitino ogimmate handaarrara bobbakkino mannootinna siviilete maamarra ogimmansanninna egennonsanni kofattote ijaarshira qeechinsa kaa`lo assitinotano kalaa Taageli coyi`rino.
Techo bayi’riidi Itophiyu haaroo`mate kofatto ijaarshi gumulshi xibbuunni 84 anga iillinohunna 375 meeggawaate wolqa burqisa hanafinohu baalunke Itophiyu daga qaccetenni qaccete geeshsha ka`ne woxinkenni, wolqankenninna egennonkenni kaa`lo assankenniiti yinohu kalaa Taageli; kaa`lo xaano ijaarshu jeefisama geeshsha kaajje sufa noosita buuxisiisino.
Baalanti Itophiyu daganna diyaasporu woxu irko gobbaanni pabliik dippiloomaasete widoonnino woxunni hendara dandiinannikki kaa`lo assitinota buuxisiise; tini kaa`lo kaajjite sufa hasiissannosetano egensiisino.
“Kofattonke mittimmanke caabbicho“ yaanno massagote qaalinni kofattote ijaarshi 11ki dironna umi gafaha wolqa burqisa harunse gobboomu deerrinni boondete hiro lamala faajje assinoonni. Boondete hiro lamala badheessa 20nni kayise dotteessa 5/ 2014 M.D geeshsha keeshshannoha ikkanno. Itophiyu latishshu baankenna bayiriidi haaroo`mate kofatto qineessaancho borro mini gutunni qixxeessitinohu gobboomu boondete hiro lamala baalanti Itophiyu daga kofattote ijaarshi jeefisamanno geeshsha agarrannisiha kaa`lo kaajjishe sufanno gede dandiisaanno millimillote battala ikkinota xawinsoonni.
Bakkalcho Badheessa 22/ 2014
