Qiddist Gezaheny
Addis Ababa;- Quchumaho waagu lexxa harunsite kalaqantino heeshshote muxximmanni dagoomu aana iillitanno xiiwo ajishate shiqisho halashshate aana illacha tunge loonsanni hee’noonnita Hawaasi quchumi doogotenna hodhishshu biddishshi sooreessinna Dikkote latishshi riqiwamaanchi kalaa Adaane Ayyelehu egensiisi.
Kalaa Adaane baxxinohunni Itophiyu Pireesete Uurrinsha ledo bilbilunni assino hasaawinni; quchumu daga sagalete laalcho taalino waaginni afidhanno gede injeessate looso hananfoonniha ikkanna aantino harancho yanna giddo Hawaasi quchumira baalante sinu quchummara Sambatu dikko halashshatenni daga hasidhino laalcho taalo ikkino waaginni dikkidhanno injoo kalaqate kaajjinshe loonsanni hee’noonnita xawisino. Konni daafira quchumu teesaano tenne injoo horonsidhe dikkotenni ajino waaginni dikkidhanno gede huwachishinno.
Hattono dagate waagu lexxa harunsite kalaqantino mitiimma sufotenni gatisate laalchu shiqisho halashshate quchumu gede illacha tunge loonsanni hee’noommo yinohu sooreessu; dikkote aana laalchu anje heedhukkinni kayinnilla mannu kalaqino anje qorqorate laalcho maaxxe anje kalaqqanno daddalaano aana kaajjado harunso assinanni hee’noonnita xawisino.
Konni gobbaanni Zayitete ledo amadisiisaminohunni sa’u lamalara quchuma 300 kume Litire Zayite e’inota kayisinohu kalaa Adaane; quchumaho gaammoonni zayte dagate hasatto co’o assite qoltannota ikkitukkinni harancho yanna fooliishshiishshannota ikkase coyi’rino.
Kalaa Adaane xawishshi garinni; aanteteno mittimmate loosi maamarra widoonni mootimma dagate shiqishshanno laalcho daga garunni afidhanno gede mageeshshi waaginninna mageeshshi laalchi e’inoro xawoho xallinanni; eino laalcho dagate suwashsho ikkino garinni iillishshannokki mittimmate loosi maamarra aana mootimma rakkino qaafo adhate qixxaabbinota ikkase uurrinshinke ledo assino hasaawinni buuxisino.
Bakkalcho Badheessa 22/ 2014
