Qiddist Gezaheny
Itophiyu mootimma Tigrayete qoqqowira mannoomittete irko hasiissannonsa qansootira mannoomittete irko shiqisho yannaasincho assatenna luphiima mitiimma aana afantanno qansoota gatisate mannoomittete yite kipho uurrissinoti qaangannite.
Tenne muro sayinsi barrinni kayisse Itophiyu mootimma batinye qaafo adhitanni afantanno. Lamalatenni lame hinge assinannita ayyerete buuwatto barru barrunkunni assinanni gede babbaxxitino kalqoomu mannoomittete irko shiqishshanno uurrinshuwara fajjo uytino.
Konni garinni xaggate, xaginsanni uduunni, woxunna qaaqquullu sagalla kaa’laano uurrinshuwa dandiitu bikkini ayyerete hodhishshinni hodhisa hanaffino. Woloota ayyerete hodhishshinni hodhisa dandiinanni mannoomittete irko hodhissanno gedeno Itophiyu mootimma fajjo uytino. Konninnino kaa’laano uurrinshuwa dhuku anjenni woyi uminsa loosu amanyootinni gede’nate akati kalaqama hoogi ka’a mootimmate widoonni rakkino qaafo adhinoonni.
Mannoomittete kaa’looshshi shiqisho iillo halashshate kalqoomu sagalete uurrinsha widoonni 43 hogowu kaameeli hogowo gide ayyerete hodhishshinni Tigrayete qoqqowi mannoomittete kaa’looshshi hasiisannonsa qansootira Ab Aala doogo widoonni shiqanno gede fajjinoonni. Xaa yannara 20 hogowi kaameella kaa’looshshu gide hogobbino gedeenni Affaarete qoqqowira Semeru quchumira uurrite afantanno.
Itophiyu mootimma Tigrayete qoqqowira noo qansoota gatisate baalanka doorsha horonsiratenni kaa’looshshe shiqishate millissanni nooha ikkirono wolu raginni qinaabbino kaa’lo afidhara didandiitino. Kalqoomu sagalete uurrinsha hodhissanno gede fajjinoonniha 43 hogowu kaameella hogowo gide kaa’lamaanote iillisha didandiitino. Konnira qaru korkaati Ab Aala kaa’looshshe sayinsanni doogo HWHT qodhaanonni cufamasenni, kaa’looshshu ayyerete hodhishshinni Tigrayete qoqqowo iillara didandiino.
Itophiyu mootimma mannoomittete kaa’looshshi hasiisannonsa qansootira mannoomittete irko shiqisho garunni iillishate halamaanonna hajo la’annonsa bissa ledo techono ikkiro murciraancho ikkase ledde egensiissanno. Konnira Tigrayete qodhaano addi addi korkaata shiqishshanni sodhino mashalaqqe fincatenni qorowante kaa’looshshu gidi shiqisho rakkinota assate uminsa qeecha fultanno gede mootimma huwachishshanno.
Hattono kaa’looshshu shiqisho sayinsanninna wolqatenni amaddino Affaaretenna Amaaru qoqqowubba woraddanni fulatenni kipho uurrisate e’ino sheemaate ayirrissanno gede kalqoomu uurrinshuwa Tigrayete qodhaano aana xiiwo kalaqqanno gede mootimma xa’mitanno.
Itophiyu mootimma Tigrayete qoqqowira shettote aana afantanno qansooti lubbo gatisate hiikkonne doorsha horonsiratenni kaa’looshshu shiqisho rakkinotanna qansootu ga’labbi yitino heeshsho massagganno gede hajo la’annonsa bissa baalanti halamaano ikkitanno yite hexxo assitanno.
Bakkalcho Badheessa 22/ 2014
