Abrahaam Saamueel
Addis Ababa:- Xaphoomu songo harissinokki hettisamaano paartubba muli yanna giddo harissanno gede Gobboomu Doorshu Boorde qaagiissitino. Hettisamaano paartera assinanniti 50 miiliyoone kaa’lote shallaggono fultino.
Itophiyu Gobboomu Doorshi Boorde hettisamaano paarte ledo babbaxxitino hajubba aana hasaabbinoha ikkanna xaa geeshsha xaphoomu songo harissinokkiti hettisamaano paartubba muli yanna giddo songo harissanno gedenna galtanno wodho woyyeessa noonsata Boordete Gambisaancho Birtukaani Mideqisti qaagiissitino.
26 hettisamaano paartuwa xaphoomu songo harissinokkiti noota kulte; songo harissanno gede sokkotenni egensiisino. Xaa geeshsha songo harissinokkiri noota Boorde buuxxino. Songo harissinokki hettisamaano paartuwa xaphoomu songo harisse ripoorte shiqisha noonsata Boordete Gambisaancho Burtukaani Mideqisti egensiissino.
Hettisamaano paartuwa galtanno wodho woyyeessitanno gede sonkoonni sokko aana hasiisanno garinni gumulamanni dino yitinoti Gambisaancho; xaphoomu songo harissinokki paarte seerunna wodhote garinni wodhonna seera woyyeessitanno yannara seeru ledo kiphi yaannokki gede gumulamannota la”a hasiissannota xawissino. Tenne hajo aana albillicho hala`ladu hasaawi hee`rannotano qummi assitino.
Hettisamaano paarte harissannoti xaphoomu songo aana boorde la’annori (taazzaawe) baalanta harinsho amada noosita huwatte baalunku harinshote buusama noota caakkeessitino. Konni garinnino albaanni xaphoomu songo harissino paartuwa mitteenni halantinokkita kultino.
Baajeettete irko lainohunni boorde ledote baajetera 230 miiliyoone birra mootimmatenni afi’rate xa`mo shiqishshe noota xawissinoti Boordete Gambisaancho; gobbate xaaddinose jifonna qarrinni kageeshshi birra aate injo nookkita xawissino.
Mootimma doorshu woraqati attamora uytino birri giddo wirro qolloonni birra hakkonne polotiku paartera irko assinanni gede Boorde fajjo afidhinoha ikkanna, konninnino 50 miiliyone birra ikkannoha paarte uydhino tajete giddo noo sanade la”atenni taalo bebbeenkannita xawissino.
Xaphoomunni gaammoonni baajeette xibbuunni 30 anga gobboomu paartera, xibbuunni 20 anga qoqqowubbate paartera, wolu kayinni meyaate miilla batinyinna meyaate massagaano miilla batinyinni hattono bisu xe`ne noonsa massagaanonna miilla batinyinni keenne uynannita caakkeessitino.
Beehaachu ledo amadisiisame mite mite paartuwa koffeenya shiqishshinoha ikkanna, loosu seeranna wodho agarino garinni loonsanni hee`noonnita Gambsaancho huwachishshino.
Boordeno, paarte shiqqishshino woxaratto kaima assite “Qarru kalaqamino” yini baycho milli yine buuxo assine hasiissanno dawaro seeru fajjanno garinni uynanni gede rippoortete shiqishshino. Konni ledo xaadinohunnino Boorde baattanni noo waagira afamishsha uynanni gede polotiku paartuwa coyidhino.
Boordete hasaawu battalara beeqqaano ikkitino paartuwa miillansa raataabbanni noota, wodani gede milli yaa hoogginotanna wolu qarrino tuncu yaanni noonsata xawissinoha ikkanna; Borde taje tittirshunni shiqqeenna albillicho buuxo assite loossannota egensiissino.
Konni albaanni, paartuwa afidhino womaashshu irko halaalunni horoonsidhinota xawissanno odiitete riipoorte shiqisha hoogguro tayxeha woxu irko eo assinannikkitano Gambisaancho qummi assitino.
Bakkalcho Badheessa 22/ 2014
