Abbebech Maatewoos
Addis Ababa:- Gobboomu deerrinni harinsoonni hasaawubba kaima assatenni dagoomuwiinni qarru gede ka’ino hajubba kaiminsanni tirate dandiisanno raga harunsannota Jireenyu paarte layinki pirezidaantichi kalaa Adem Faarahu xawisi.
Kalaa Adem Itophiyu pireesete uurrinshara xawisino garinni; Jireenyu gobboomu deerrinni harinsoonni hasaawubbara ka`ino hajubba garunni amadino. Mitte mitteenti hajo tirantannota paarte hasaabbino. Qarru gede ka`ino hajubbaha qara korkaata badatenni qarubba kaiminsanni tirate dandiissanno raga harunsanno.
Hasaawu battala aana afantino hajubba gama harancho yanna giddo tirantara dandiitannoreeti yinohu kalaa Adem; kurirano rakkino dawaro uytanno mixo qixxeessatenni loonsanni; mite mite kayinni mixote biso ikkite aantete tidhantanni hadhanno yino.
Gattinore mixotenni amande aantete illachunni gumullanni. Mite mite hajubba kayinni gobboomu amaalera ajanda assine hasaambi gedensaanni gutu sumiimme kalaqa hasiissanno hajubba ikkansa coyi`rino.
Afi`noonni hedubba aantete mixote widira soorrantanno. Gobboomu, qoqqowunna quchumu deerrinni mixo heedhanno. Deerru deerrunkunni woradu geeshsha dirritanno mixo qixxeessinanni. Dagate hasaawi kaajje sufannotano buuxisino.
Kalaa Ademi xawishshi garinni; mixote aana dagatewiinni ka`ino xa`mubba garunni la’anntanni tirantanno; mamoote, hiittoonninna ayeenni gumulantannoro xawinse worranni. Harinsho harunsineemmo ragano worroonnihura loosunni dawaro aate dandiissitanno qixxaawo assinanni afammanni yino.
Quchummate hattono woraddate harinsoonni battala xaphi assine la`nanni woyte aantete gobboomitte sumiimme kalaqa hasiissanno, beeqqisiisaancho gobboomu amaalera ajandu gede amadanteenna hasaawa assinannirinna gobboomu beeqqisiisaancho amaalera hedo ikkitanno haammata hajubba ka`ino.
Beeqqisiisaancho gobboomu amaale uurritino komite qineessaanchimmanni umisi haruma harunse gumulamanno. Aantete ajandubba baxxitanno, hasaawa assinanni akati hee`rannosi; harinshote kaima ikkitanno coyibbano afantino.
Amaalete hendeno songote ragubba daga affaranna la“ama hasiissannonsa hajubba heedhuro leddanno gede assate ikkinotano qaagiissino. Daga alba hiittoo hajubba kayissinoro, hiittoo dawaro aamantinoro, harinshote aana noori gumulantanno gede dagatewiinni may agaramannorono hasaawu leellishino.
Songote ragubba qooxeessubbate leellanno akati garinni gumulantara mootimmate widoonni addhinannihanna dagano gumula noonsare xawinse worroonni. Worroonni ragubba duuchante qooxeessubbara gumulatenni hasi`nanni gumi borreessamanno gede dagate widoonni noo kakkaooshsheno la“ate dandiinoonni.
Daga paartetenna mootimmatenni illacha hasidhannona tirama noonsa yitanno hajubba xawadimmatenni kayissino. Hasaawu battalara wole yannanni baxxitino harinsho harunsitino. Mittu qoqqowi massagaanchi wole qoqqowo ha`re hasaawisino, ka`anno xa`mubbanna abbooshuwanni woyyitino hedo amandoonni; dagoomu mittimmara umisi kaa`lo baraarsate dandiissannoho yino.
Beeqqaano rosamino garinni addaarro albi leellannoha ikkinokkita, mitte mittenta dagoomu bissa garunni riqiwannonna hedonna hasattonsa xawissanno bissa riqiwantanno gede assinoonni; riqiwamansano xaphoomu battala leellishshinno.
Battalla illachinsa kaimaho ikkitanno hedo shiqishshu gedensaanni hala`lado yanna dagate uyte macciishshate harinsho harunsitinote; daga kayissino hedubba battalate aana dawaro aa ikkitukkinni hajubba borreesse qorqoratenni aantete loosunni dawaro aate dandiisanno garinni qixxeessinoonniho. Harinshono gumaamete yino.
Bakkalcho Badheessa 22/ 2014
