Amsaalu Felleqe
Addis Ababa;- Sidaamu qoqqowi tantanami kawa zoonete tantano assinara hendoonniti xaa geeshsha keeshshitara dandiitinohu dagate horora hossanno latishshu loossara balaxo uyneenna ikkinnina dagate xa’mora dawaro qola hoogate hasi’neenna ikkinokkita qoqqowu jireenyu paarte borro mini sooreessinna paartete mereershu komite miili kalaa Abrahaam Marshaallohu coyi’ri.
Qoqqowu tantanonni aanne zoonnate tantanora yine bejete amandeenna xaa geeshsha mayira gede’nitu? Yitanno xa’muwa ragu ragunkunni ka’anno. Ikkollana tenne hajora yine amandoonni bejeteno ikkado di-ikkitino. Daga amandoonni bejetenni doogo, waa, caabbicho, hattono babbaxxitinota dagoomittetenna miinju kaa’lo assitanno pirojektuwa loonsansara hasidhannotano egensiisino.
Balaxo uynara hasiisannohu dagankera rahotenni hasiissanno hajubbaati yinohu kalaa Abrahaami; bejeteno konni alba noo Zoonete tantano deerrinni amandanni bikkinni ikkinnina Sidaamu qoqqowira baxxitino shallagonni uynoonni bejete dino yaanni coyi’rino.
Zoone tantananturono woradda qineessitannotanna kiirotenni shiima manna riqimbe loonsannita ikkinnina batinye mannu wolqa qaxarranni tantano heedhannokkitano huwachishinno.
Konni daafira dagate qara ikkitino hajubbara balaxo aatenni bejete tantanontenni hala’lado dagara horote hosanno latishshira ikkanno gede hende zoonete tantano gede’nitanno gede assinoonnita kalaa Abrahaami Itophiyu pireesete uurrinsha ledo bilbilunni assino hasaawinni xawisino.
Daga qoqqowu giddo hiikkunni qooxeessirano xeertinye hodhite tootayyaabbukkinni hasiissanno owaantenna farco afidhanno akati nootano qummi assino.
‘’Zoone tantananturo loosu hoongi kiiro ajishshanno’’ yitanno hedo dagatewiinni ka’annota huwachishinohu kalaa Abrahaami; loosu hoongino ikko miinju, dagoomittetenna danchu gashshooti qarri zoonete tantanonni tidhamara dandaannokkitanna balaxo aa hasiissanno hajubbara balaxo uynanni xa’mubba dawaro afidhanno gede assinannita huwachishino.
Sidaamu daga konni albaanni seeda dirrara umonsa gashshate sharrantanni keeshshsitinotanna soorrote gashshootinni umonsa gashshate qoosso afidhinota kayisinohu sooreessu; qoqqowonke zoonetenni tantanate konni albinte gede gufisannonkerichi heerannokki daafira amandoonniti soorrote harinsho guma gansiisate dagate xa’mo dawarranni ha’neemmo yee; zoonete tantano albillicho gumulantannota lede xawisino.
Bakkalcho Badheessa 22/ 2014
