Abrahaam Saamueel
Addis Ababa:-2014 M.diro hawadi yannara chiginye kaasate mixora 6.7 biiliyone kaayishsho qixxeessinoonnita xawinsoonni.
Giwirinnu Ministeere Kalaa Umeri Huseennihu I.P.Ura xawisinonte gede, tayxe hawadira kaasate agarooshshu chiginye ledo 6 biiliyoone chiginye qixxaabbino.
Mixote aleenni qixxeessinoonnihu ba`annota hedote giddo worreeti yiinohu Minsterchu, chiginyete qixxaawo hanaffinohu sai hawadira chiginye kaanse jeefinsi gedensaanniti yiino.
Qixxaabbanni nooti chiginye sasu dirinni kayise ontu diri geeshsha dawadhite iillitannoti haanju minjira qeechase fultara dandiitannotenna sagalete umo dandaate kaa`litanno gatu kaayishshinna ataakltete sircho amaddino abukaadote gedee sircho 40 -50 xibbunni amadanno. Gattinori dubbu owaantera ikkitanno chiginyeeti.
Kaansoonni chiginye dawadhote bikka ministire harunso assitanno amanyooti noota kulinohu Minsterchu, sai diri hawadi yannara kaayinsoonni chiginye layinki doycho jeefama hooggurono umi doycho towaanyonni xibbbunni 80% anga dawadhitinota qummi assino. Dawadhate bikki umi dironna layinki diro dawadhitinohunni aleenni ikkase qaagiisse, konne diro diilallote gadi soorronna wolootta gobboomu korkaatinni albi gede dawadha ajjurono haammata chiginye kaayinsoonni daafira dawadhote bikki ikkado ikkinota qummi assino.
Ayirradu Xaphoomu Ministerchi Dr Abiy Ahimedihu worino faashonni, 20 biliyoone chiginye mixo shoolu diri giddo jeefo afidhanno. Sasu diri giddo 17 biliyoone ale kayinsoonnita qaagiisse tayxe kaayinsannihu ledo mixote aleenni gumula dandiinoonnita Minsterchu coy`rino.
Kalaa Umeri coy`rinonte gede, chiginye kaaysate mixo uurritannoha ikkikkinni layinki dooychono suffannota ikkktanno. Layinki doycho isilanchimma kaima assine sagalete hossanno chiginye gobbate giddora woxu soorronni eanno laalcho riqiwate dandiisiisannote aana illachiinshaanni.
Olluu gobba ledo halamme kalanqenna dagate mereero noo xaadooshshe kaajjishate hende amandoonni mixo Jibuutu gobbara chiginye sonkoonni. Ertirahonna Wodiidi Suudanera dandiinni deerra ropilunninna kaameelunni soya dandiinoonni. Albilichono, kalqete xaaddino diilallote gade soorro dandaatenna mittimatenni latisate, Itophiyu assanni noo kaa`lo kaajjitanni suffannota xawisinohu Ministerchu, xa noo hanafo dancha ikkitinota coy`rino.
Tayxe 2014 M.Diro hawadi yanna chiginyete kaayishshi hanafamanno yanna xeenu raga la`nanni gumullanni yiinohu Ministerchu Umeri, xeenu yanna Ellanna Maaja aganira ikkannohura hakkawoyte kaaysa hananfanni yiino. Dagano chiginyete kaayishshi yannara woshshatto assiniro fulte kaaysatenni gobboomu qeechansa fultanno gede woshshatto assino.
Bakkalcho Badheessa 22/ 2014
