Yaareed Geetaachew
Addis Ababa;- Qoqqowu giddo duucha handaarranni loosantanno loossa rippoorte halaalaancho ikka noosetanna kaphu rippoorte gata hasiissannota Sidaamu qoqqowi mootimma pirees Sekretaare egensiissu.
Sidaamu dagoomu qoqqowi mootimmara amandoonnihu 2014 bejetete dirinni duuchante latishshunna danchu gashshooti handaarranni gumulate mixi’ne sai 9 aganira gumulloonni loossa rippoorte shiqqeenna qoqqowu deerrinni tenne lamalara keeno assinoonni.
Assinoonni keeno lainohunnino qoqqowu Pirees sekretaare sooreessi kalaa Filiphoos Naahomihu baxxinohunni Itophiyu pireesete uurrinshara xawisino garinni; seeda dirrara albaanni noo rosichi mittu woradira dagoomaho latishshu loossa loonsoonni yine kaphunni qoqqowu loosu gumulsiisaanora shiqinshanna dangoonni harinsho kaphunnita ikkitinota buunxoonni.
Xaa yannara kayinni hiittenne baserano dagoomaho hasiissannota latishshu loossa mixi’ne gumulloonni yine kaphunni abbinanni rippoorte luuxxe sa’anno faro dino yino sooreessu.
Qoqqowu deerrinni sai 9 agani loossate mixo gumulshi rippoorte keenate harinsoonni ba’re beeqqitu bissa uminsanni kayissino hedonna duudhe torbitino garinni konni gedensaanni kaphu hala’lanno doogga cufantinota leellishannoho yino kalaa Filiphoosi.
Konni albaanni loosu minna mixonke gumulloommo yite borreessite uytino riippoorte amaalete mine massine keennanni; xa kayinni amaalete mini wirro keenannohano ikkiro; qoqowoho ikko woraddate deerrinni xaphooma loosu massagaano mitte mittenta loosu minna mixonna gumulsha keentanni hadhanno rosicho adhite fultinota xawisino.
Sidaami daga konni albaanni zoonete tantano deerrinni heedheenna babbaxxitino pirojektuwa loonsanni yine su’ma amandanni; bejeteno amandoonni yinanni amaalete minira shiqinshirono dagate kayinni loonsoonniri nookki daafira dagano halaalunninna taalo ikkino garinni beeqqaanonna horaameeyye ikkate sharro assitanni keeshshitinota qaagiissinohu sooreessu; hattenne yannarano qoqqowu giddo suuqantinori mite mite bissa kalaqqanno sharrenni kaphu rippoortenni daga horaameeyye ikkitukkinni keeshshitinota xawisino.
Tini yanna kayinni Sidaamu seeda yanna sharronni qoqqowo ikke umisi umosi gashshatenna latishsha afi’rate mageeshshi waaga baantoonniro baalunku afino hajo ikkitinohura qoqqowu giddo deerru deerrunkunni noo tantanonni daga gashshitanno bissa konni halaali daafirano co’ichanna taalo ikkino looso loosa hasiissanotano qaagiissino.
Sooreessu amadisiiseno; ’’daga donganni afidhinokkirenna iillinonsakkire afidhino yinanni kaphunni shiqinshanniri cubbo ikkino gede keenote ba’rera kayinsoonni’’ yee; ‘’dandaami garinni dagate hasiisannore baala ammanamatenninna daga uytino yawo garinni soqqamme loosa hasiissannota raga worroonni’’ yino.
Albaanni rosamino garinnino mixo mixi’nirono dagate garunni iillinshoonnikkirenna loonsoonnikkire loonsoommo yinanni woraqatunni dongana qixxaabbino mixo gumullikkinni sheshsheerantanni dirunni diro sa’anno harinsho konni albillitte heedhanno kaayyo nookkita kayinsoonnita qummi asse; albillichono qoqqowu giddo mixo yinoonni yanna giddonna isilanchimmanni gumulantanno gede assinanni ha’nannitano huwachishino.
Wolu ragaannino gobbankera daggino soorro Itophiyaho babbaxxitino kaayyo abbitino; konninnino umihunni manchi beetti kalaqamunni afi’rino mannimmate qoossosi ayirritino yannaati yinohu qoqqowu Pirees sekretaarete sooreessi; dagano xa’midhanno xa’mora dawaro qola hasiissannota mootimma ammante loossanni dagginotanna daga macciishshantanno yanna ikkaseno buuxisino.
Xaa yannara qaccetenni qaccete geeshsha noohu Itophiyu qansichi gobbasi daafira eessannosi, hasaawanno gumulo aanno yanna ikkasennino dagawiinni maanxe, dongenna awaawurre sa’nanni harinsho nookkihura qoqqowinke gedeno olluubbate geeshsha noo tantanora daganke massagganno bissa halaalunninna ammanamatenni loosate qaale e’ino ba’re harinsoonnitano lede xawisino.
Bakkalcho Badheessa 22/ 2014
