Itophiyu duuchanka woyte kalqete xawira su’mise ayirrinyunni woshshamanno gede assitannoti Atleetiksete Ispoorteeti.
Ilamate tarenni duucha woyte luphi yite leeltannori muxxe Atleetootise bayira Ispoortete ba’renni Olompikenna kalqete Atleeiksete shampiyooninni gobbaanni kalqete mini giddo shampiyoninnino luphi yee leellanno gumi noonsa. Heewote 40 dirra aleenni keeshshitino dhagge mitte yanna gobbaanni baalantera beeqqa dandiitinoti Itophiyu 18 ki yannara Serbiyaho Belgireedete harinseenna sai sambati barra gumulantino kalqoomu mini giddo Atleeetiksenni dhaggetenni umi yannara 126 gobbuwanni umita ikkite jawa ayirrinye afidhinoti qaangannite.
Itophiyu shampiyoonunni 800 meetire heewonni meentunnino labballunnino sasu xeertinyinni calla beeqqite Shoole Culka, Sase Birrunna Lame Camote xaphoomunni Honse meedaaliya afidhe umita ikkite gumulatenni bayira gobba Ameerika harunsiisidhe kalqete gobbuwanni balaxaancho ikkatenni naaxxisiissanno dhagge borreessiissino.
Belgireedete keeshshitu yannanni gobbansa su’minna faarso higge higge gotti yite macciishshantanno gede baandeerinsano gotti yee leellanno gede bareendetenni sokkonsa fultinori bareeddate gaamo gobbansa keerunni higgino.
Gaamo gobbansa higge boole kalqoomu horophillu fooliishshi’ranno base iillitu woyte iibbadu amanyootinni haa’noonninsa.
Gaamo boole kalqoomu horophillu fooliishshi’ranno base iillitu yannara IFEDR budunna ispoortete ministrchi Qejela Merdaasa, ministr dieetu Ambaasaadder Mesfin Cherinnetihu, Itophiyu Atleetiksete federeeshiine pirezidaante komaander Daraartu Tullutinna loosu gumulsiisaano komite miilla, Itophiyu lekkate kuwaase federeeshiine Pirezidaantichi Isayas Jira, 20 diri woriidi seennu lekkate kuwaase gaamo miilla, Atleetiksete ispoorte ogimma maamarra afante daraarchu aamansha uytinonsa.
Aanteteno gaamo daga la’’ara fano ikkino kaameelinni dukkisante abbitino guminni hagiidhitino daga keere haadhanni Addis Abebu doogimarrara doyitino.
Bareeddanna gaamote massagaanonsa borreessiissino gumira woxu baraarsha uynoonninsa.
Konninnino Culku meedaaliya afidhino Atleetooti 40 kume birra adhitanna, Birru meedaaliya adhitinori 25 kume hattono Camote meedaliya afidhinorira 15 kume birra uynoonninsa.
IFDR budunna ispoortete ministrchi Qejela Merdaasa , afi’noonni qeellera hawalle tashshi yinonke yitanno sokka sayisino.
Itophiyu Atleetiksete federeeshiine pirezidaantitte komaander Daraartu Tulluti ise widoonni hawalle tashshi yinonke yitanno sokka sayisse; qeelle Itophiyu hexose gotti assitinnota ikkase hagiirrunni wo’mite coyidhino.
Bareeddate gaamo massagaancho dukko Abeba Yesuufitino., Gaamote miilla millimmillotenni heewote geeshsha luphiima gaamote macciishshamme giddo noota xawisse; kalqetenni umire ikkansanni haaro dhagge borreessiisansanni kalaqinonsa hagirre xawissino.
Qiddist Gezaheny
Bakalcho Badheessa 15, 2014 M.D
