Baincho assootenna muishsha gargarate hattono gobbate giddonni ba”anno gede assate jawu qeechi noonsata amma’note uurrinsha massagaano xawissano.
Hawaasi Quchumi Isiliminnu Amma’no Hajo Borro Mini Qaru Borreessaanchinna Quchumu Amma`note Uurrinshahu Qaru murrichi Haaji Hashiimihu; Dr Abiy Dagate Riqiwamaanowiinni ka`ino xa`mora dawaro qolanni, baxxinohuni bainchu assotenna muishshu aana assinanni sharro kaajja noosi yee qolino dawaronna mooraano cibbidhanno ikkinninna di-ittanno yiinoti daga baalanta mooru aana noose hedo soorritinote yaanno.
Mooraanchu lameho; mitu hudire moorannoho; mitu afi`re hee`renni duu`naranna cibbi`rara mannu anganni haqaqqaale adhannoha ikkinota kulinohu Haaji Hashiimihu; hudi’re moorinohu nafa garaho yaa ikkitukkini, duu`nara cibbi’rara moorannoha maganuno giwannosi mootimmano xa`mitannosi yaanno.
“Tenne yannara tini mooraano moortannohu Itophiya calla ikkikkinni amansawiinna anninsawiinni, hattono hudi’re, goo’renna kalle noo manchiwiinni moortanni noota kulinohu Haaji; Qullaawu Quraani giddono mooru baincho assoote ikkinota hala`ladunni xawinsoonni” yaanno. Haaji yaatto garinni, Qullaawu Quraani giddo manni woxe adhinohura maaro nookkitanna Kaaliiqino konne assoote effi’re giwannota kulino. Mannu woxe haqaqqaale adhe
loosikkinni harancho doogonni duroo`mara hasi`rannoha Qullaawu Quraani adhino woxe qola geeshsha hakkuy manchira maaro noosikkita xawisannota kulino.
Itophiyu Heeshshote Caabbichi Amma`no Borro Mini Pirezidaantichinna Itophiyu Wongeelu Amma`no Amma’note minna Mittimmara Boordete Gambisaanchi Paasteri Senbeto Bashihuno isi widoonni; Qullaawu maxaafi giddo mooru daafira haammata baycho borreessinoonniha ikkanna, keeraancho mancho shaate woy mundee dunate muishsha adhitooti yaanno.
Muishsha adhino Manchi dagate halalaancho yoo diaanno; ille ballanno yaannotano xawisino. Paasetri Senbeto ledote “Maganu qaali giddo Saamueeli ooso yoo dassitunna shokkishshu woyte mereeronsa keeru ba`nota qaagiisse; gobbate keere hunannorichi giddo mooru mittoho” yaanno.
Muishshunna dawashsho yoo baattote aana hala`litanni hadhuro daga hexxo mudhitanni hadhannoha calla ikkikkinni mitiimmano kalaqantannoha ikkinota kulinohu Paasteri Senebeto; mannu loosi`rinoha mixxanno daafira mooraano; angansa konni bainchu assootinni eemarama noonsa yee xawisino.
Daaffurrikkinni afi`noonni jiro Kaaliiqi maassi’rannokkiti xawo ikkitinota buuxisinohu Paasteri Senebeto; hunkiisinni dafenna daafure loose afi`rino miinja Kaaliiqi maassi`rannota xawisino. Dr Abiy yaattono halaalanya ikkitinota kulino.
Paasteri Senebto Bashehu yaatto garinni; bainchu assootinna muishshu mootimmate uurrinsha giddo calla nooha ikkikkinni amma`note uurrinshano konni loosinni xalaltinokki daafira ninke amma`note uurrinsha massagaano dagate lawishsha ikkine harunsaanonkera seekkine huwanyo kalaqa hasiissanota qaagiissino.
Abrahaam Saamueel
Bakalcho Badheessa 15, 2014 M.D
