Addis Ababa:- ‘’HR 6600’’ nna ‘’S 3199’’ yine shiqinshoonni seeru wodho Itophiya mundeete kakkalonni ayirrisiisino wolambinate wole doogonni qocate qineessinoonni sharreeti yino miseessu Xaphoomu ministrchinna Gobbayidi hajo ministirchi kalaa Demmeqe Mekonninihu.
Ameerikaho heedhannori wo’manti Itophiyu ilama shiqqino seeru hedo kaajjitannokki gede jawa gaado harissanno gede xa’mo shiqishino.
Kalaa Demmeqe wo’munku Ameerikira afantanno dagoomu tantano sooreeyye, Task Forsete, sivilete maamarra massagaanonna riqiwamaano ledo hasaawa assino.
Hasaawu aanano xawisino garinni; Ameeriku kongiresenna seneete widoonni hedote aana afantannori ‘’HR 6600’’ nna ‘’S 3199’’ yaamante shiqqino seeru wodho Itophiya mundeete kakkalonni ayirrisiisino wolambinate wole doogonni qoce adhate kalanqoonni sharreeti.
Tini wodho kaajjituro Itophiyu wolootu gobbuwa ledo hee’rannosehu ga’labbote, miinjunna poletiku xaadooshshe woloota wolquwa dancha fajjo aana rarra’e umose gargadhitannokkita laafa gobba assannoho yino.
Konni gobbaanni hooffaydi heeshshote deerrira afantanno daga lede diyaaspora ama gobbansanna fiixinsa ledo tayissannota lowo geeshsha kuttubbannotanna anfe egenninoonnikki wolambinate ho’linanni seeru wodhooti yino.
Sai mittu dirinna bocu yanna giddo gobbankera xaadinoseha kalqoomu dipploomaasenna xiiwo dandaate diyaasporu qorrunna arrishshu hoolinsakkkinni leellishino halaalaancho gobbate baxilli daafira galata shiqishinohu kalaa Demmeqe; kuri seeru wodho kaajjitannokki gede wole yannanni aleenni qinaabbino mittimmanni millissanno gede xa’mino.
Mootimma adhitanni noo qaafo gobba balaxisiissinotenna sufo noo keerenna mittimma hedote giddo woratenni gumullannire ikkansa qummi asse; Itophiyu wolambinati aana mamooteno ikkiro yekkeeramannokkita coyi’rino.
Itophiyu Ameeriku ledo nooseha seeda dirra kiirsiisino xaadooshshe kaajjishate wo’manka woyte qixxaabbinota ikkase xawisinohu ministirchu; wolambinatese xiiwanno gadacho kayinni adhitannokkita buuxisino.
Ameerikaho heedhannori wo’manti Itophiyu daga Ameeriku amaalete minnara Itophiyu aana sayisate mixi’noonnire lowo geeshsha kaajjado seera kaajjinshannikki gede luphiima gaado assitanno gede miseessu xaphoomu ministirchinna gobbayidi hajo ministirchi kalaa Demmeqe mekonninihu xa’mino.
Ambaasaadder Fitsum Araggihuno isi widoonni; diyaasporu qooxeessinsara noore mootimmate dooramaano Bilbilunni, Imeeletenni, malaate gamba assatenninna albaanni xaadde seeru wodho diigate aana xawissanno gede xa’mino.
Hasaawu aana afantino beeqqaano seeru wodho mootimmannitanna paartennita ikkitukkinni gobbate mittimmanna sufo danote aana tuggannore ikkansanni wole yannanni aleenni qinaabbe loosate noowa heedhe amaalantanno gede loossannota sheemaate e’’ansa Ameerikaho Itophiyu Embaasenni fultino mashalaqqe leellishshanno.
Qiddist Gezaheny
Bakalcho Badheessa 15, 2014 M.D
