Addis Ababa;- Quchumu dagoomira isilanchimma nooha fayyimmate owaante aate illacha tunge loonsanni hee’noonnita Hawaasi quchumi gashshooti fayyimmate biddishshi egensiisi.
Biddishshu sooreessi kalaa Munxaashi Abrahaamihu baxxinohunni Itophiyu pireesete uurrinshara xawisino garinni; quchumaho fayyimmate owaante iillisho lainohunni isilanchimma noo garinni dagooma horonsi’raano assate illacha tunge loonsanni hee’noonni.
Isilanchimma noosiha hurrete xaginaati owaante aatenna konnirano ikkado handaaru ogeeyye fayyimmate uurrinshuwara heedhanno gede assatenni hattono xaginaateho hasiisannore wonshatenni dagoomu umisinni hasiissannoe fayyimmate owaante afi’ra dadiinoommo yite addaxxitanno uurrinshuwa kalaqate illachinshe loonsanni hee’noonnitano kalaa Munxaashi xawisino.
Gobbanketi fayyimmate poolise dhibba balanxe gargadhate aana illachishshinota ikkasenni fayyimate uurrinshuwanna ogeeyye duuchunku dagoomira iillite owaante uytanno garinni loonsanni keeshshinoonni.
Hawaasi quchumirano konni garinni loonsanni naaxxisanno guma maareekkisiisa dandiinoommo yino.
Quchumaho afantanno settente sinu quchummara hasiissannota fayyimmate keelluwanna xaawubbano hattonni wonshinoonni yino sooreessu.
Hospitaallate iillishono lainohunni quchumaho 1 Riferaale, 1 xaphooma hosiptaalenna 2 umikki deerri mootimmate hospitaalla hattono onte hallanyu hospitaalla afantannotano xawisino.
Fayyimmate xaawubba lainohunnino haaruudde lede 11 nooha ikkanna 6 xaawubbara xaginaatu doktorra gaama dandiinoonni.
Wolootta fayyimmate ogeeyyeno ikkadu garinni duuchante uurrinshuwara gaammoonnitano hattonni xawisino; sooreessu. Konni garinnino owaatamaano xeertidhe hadhukkinni hasiisannonsaha fayyimmate owaante harancho yannanna lowo woxenna yannansa guxxitukkinni isilanchimma noosi garinni afidhanno gede assinanni hee’noonnitano hattonni.
Wolu garinnino quchumaho afantannori fayyimmate xaawubba mereerinni lamu Raajete owaante uytannore ikkitinota lede qummi assinohu biddishshu sooreessi; godowii noo amuwira balaxotenna ilate yanna buuxo assate lowo garinni owaante uytanni afantannotano xawisino.
Quchumaho fayyimmate uurrinshuwa iillisho xibbuunni 94 anga iillinota xawisinohu kalaa Munxaashi; ogeeyyeno hattonni hasiisanno garinni gaamate dandiinoonnita xawisino.
Dhibba balanxe gargadhate loosono kaajjadu garinni loonsanni keeshshinoonni. Labbanno loossannino fayyimmate owaante isilanchimma agarsiisate Federaalete Fayyimmate ministere wortino faasho garinni owaante aatenni owaatamaanote kasseenyi noo deerrano buuxate xiinxallote loossa loonsoonni yino.
Baxxinohunni amuwu reyo ajishate ragannino jawaachishshanno loosa gumulloonni; yee ikkollana marqu qaaqquulli reyo ajishate ragaanni kayinni xaano jawu mini loosi agarannota qummi assino.
Fayyimmate owaante isilanchimma buuxisateno xaa yannara handaaru ogeeyye danchu amanyooti noonsarenna owaatamaano hasiisano garinni awuuttannore ikkitanno gede assateno hattonni illacha tunge loonsanni hee’noonnitano sooreessu lede buuxisino.
Amsaalu Felleqe
Bakalcho Badheessa 15, 2014 M.D
