Hawaasa: Bero barra Sidaamu Dagoomu Qoqqowi Mootimma Hawaasi Quchumra Jireenyu Paarte umi songonni wortino faasho kaiminni dagate hasaawu bare ha’rinsoonni.
Bareno Amaaru Qoqqowi Layinki Pirezidaante Ba’lattonni Miinju Kilastere Qineessaancho Dukko Aynaalem Nuguseti, Sidaamu Qoqqowi Pirezidaantichi Kalaa Desti Ledamohunna Hawaasi Quchumi Kantiiwi K/Pirofeesere Tseggaye Tukehu massaggino.
Hasaawu beeqqaano addi addi xa’mubba kayisseenna baretenni dawaronna xawishsha uynoonni. Xa’mubbate mereerinnino oosonsati loosu hoongi jifo ikkinonsata hasaawu beeqqaano kaajjishshe coydhino.
Xa’mubbateno dawaronna xawishsha uynohu qoqqowu pirezidaantichi Kalaa Desti Ledamohu; rossino ooso mootimma qixxeessitanno wole loosu injora bobbahantenni roore mootimmate loosi
handaarira qaxarante calla loosate hasi’ransa qara qarra ikkitinota coy’rino. Qoqqowoho xaphooma mootimmate loosaasine kiiro 92 kume ikkitinota xawisinohu pirezidaantichu;xaa yannara looso hoogino manni kiiro kayinni 110 kume ikkitinota coy’rino.
Pirezidaantichu amadisiiseno, tini 92 kume loosaasine mootimmate loosi handaarira qaxarantinohu 30 diri giddo ikkinota xawisino.
Loosu hoongi qarra ikkinota huwanteemmono yiinohu Kalaa Desti; konne baala looso hoogino manna kayinni mootimmate loosi handaarira calla gaamme gundannikkita dimaaxino.
Ronse dagganni woyte mootimmate handaarira gaamamme loosate ruukko qoqqowinkera haaro ikkiteennaati ikkinnina mite mite qoqqowubbara dirra kiirsiisinoha ikkinota kule; lawishshu gedeno, Amaarunna Oromote qoqqowubba kulino.
Amaaru Qoqqowu La/Pirezidaante Ba’lattonni Miinju Kilaastere Qineessaancho Dukko Aynaalem Nuguseti ise widoonni; Jireenyu Paarte gumulate hasidhanno latishsha jeefisate paartete giddo noo boodu manninni calla ikkikkinni daganke jawa wolqanniiti gumulantannohu yitino.
Loosu kaayyo kalaqo aanano hedose uytinoti Dukko Aynaalem; Mootimmate goli callichisi loosu kaayyo kalaqaancho ikkinokki gede huwachishshe; looso minshummokkinni loonsammora qummeesseemma yitino.
Hawaasi Quchumi Kantiiwi Ka/ Pirofeesere Tseggaye Tukehuno isi widooni coy’rino garinni; babbaxxino qarqarinni qoqqowunnino ikko qoqqowu gobbaydinni quchuma daanno manni kiiro bati’ra quchumu giddo looso hoogino manni kiiro luphi yitanno assino gede xawise; xaano ikkiro loonse soorrammeemmo yitannorira quchuminke qixxaawanyaho yiino.
Addisu Adoola
Bakalcho Badheessa 15, 2014 M.D
