Itophiyu mannoomittete qoosso komishiine muli yannanni fushshitino riippoortenni; cancishaano HWHT Amaarunna Affaarete qoqqowubbara geerru gatikkinni siyattinota, surrete xissamaano ledde keeraano qansoota barshetenni shitinotanna wolootu aanano kakkachimmatenna barshete assootta iillishshinota egensiissino.
Konni assootira aamantinotinna Qoobbote quchumi teesaancho dukko Abbebu Gebreti; shoolu diri qaaqqo’ya annise HWHT gaamonni shaamamanna illesenni la’’asenni buqqeese lowo geeshsha gawajjantino yitanni basete afantanno Itophiyu pireesete uurrinsha odeessaanora xawissino.
Teesaancho; gaamote qodhaano Maaja 16, 2013 m.d barri looso loose minesi massagannoha minaannase mininsa waalchira kakkachimmatenni shitinnota kultanno. Dukko Abbebu xawishshi garinni; kalaa Zewudu reyinohu lamu qaaqquullisi albaanni ikkanna konninni kainohunni mitticho qaaqqonsa beqqee lowo geeshsha gawajjantinotanna xaa geeshshano ‘’Anna’ya Juntu shiisi’’ yitanni wi’litannota xawissino.
Cancishaano keeraano qansoota shaansa ajjukkinni shiidhino maate budu garinni wi’lite reeshsha madaadhitannokki gede ho’litinno yitannoti dukko Abbebu; shituerono shitoena yite lame manna lexxite minaannise reeshsha madaadhitinnota xawissino.
Gaamo Qoobbote quchuma amaddu yannara minaannase ledde batinye wedella shitanna lainota coyidhanno.
Wolu hunaano wolqanni beettosi hooginohu kalaa Akkele Abbebehu; maccate xisso noosita xawise beettisi shaamaminohu barra irshu loosira hose minira higanni hee’re ikkinota xawisinno.
‘’beetti’ya Zinaabe Akkelehanna lossi’roommo beetto’ya Alittaaseb Weretawuha barra Irshu loosi aana hosse higganni noore gaaretenni dirrisse shitinnonsa’’yinohu kalaaAkkele ‘’Harrichu gaare goshooshanni callisi daanna la’’e dodanni mareeemmo woyte lamunku uulla ubbe no’’ yaatenni illesinni laino halaale farci’ranno.
Kalaa Akkele agarooshshu loosinni heeshshosi massagannoha ikkanna loosannota mootimmate uurrinsha dimulqisiiseemmo yaasinni qawwete coriidinni ganameenna albiidi hinkosi giggiltinota xawisinno.
Cancishaano HWHT gaamo Qoobbo amadde keeshshitu yannara mine minenka e’anni woxenna anga bilbila mulqidhinota hattono daga noo’nere abbe yitanni gantanninna shetissanni keeshshitinota qummi asse; quchumaho mootimmannitano ikkitoo hallanyu uurrinshuwa jajja mulqi’ransa xawisino.
Qiddist Gezaheny
Bakkalcho Badheess 8, 2014 M.D
