Xaphooma 600 kume Litre sagalete Zayte e’anno yine hendoonniha ikkirono; umi doyichonni 355 kume Litre eessine geexaanote maamarrara iillinshanni hee’noonnita sidaamu qoqqowi daddalu Indastire biiro egensiissino.
Gattinoti 245 Litre zayte albiidinke Qidaame geeshsha qoqqowo e’eenna geexaanote maamarrara beenkanni yine agarrannita buuxisino.
Sidaamu qoqqowi daddalu Indastire biiro sooreessi kalaa Ashshaagre Jemberehu Bakkalcho Gaazeexi ledo assino hasaawinni; xaphooma qoqqowu gede Zaytete hasattonke 3 Miliyoone ale ikkitanna xaa yannara qoqqowoho gaammoonni Zayite mootimma Faabriku waaginni Geexaanote shiqishshannota ikkase kule; geexaanote mittimmate loosi maamari hundaanni hanqafantino dagara shiqqannota ikkase huwachishinno.
Konni ledo amadaminohunni mite mite Hawaasi quchuminna woraddate afantanno geexaanote maamarrara iillitinota buunxoommo yinohu biirote sooreessi; gattinoti 245 kume litre e’anno woyte maamarrate widoonni baalante dagara iillitanno yine hendannita coyi’re; laalchu eeli geeshsha dirre daganniwa garunni iillasino tenne hajo harunsitara quchumu gashshoottanna woraddate uurrinsoonni wolqa widoonni qorqorrannita xawisino.
Anfinte gede waagu lexxa qoqqowunna gobboomunnita calla ikkitukkinni kalqete hajo ikkasenni mootimma heeshshote akata la’e lamu garinni loossanni noota qummi assinohu kalaa Ashshaagre; umihu gobba giddo afantanno faabrikka gobbaydinni filantinokki Zayte eessite gobba giddo filte sagalimmate injeessite geexaanote iillisha; ikkanna layinkihunni mootimma afidhannota luphiima jiro agurte gobbayidinni sagalete laalchi qaraxiweelo e’’anno gede injeessitino.
Konninnino mootimma uminsa Doolaare noonsari gobbaanni heedhannori Itophiyu qansootanna ilama ikkitino daga qaraxiweelo eessitannohu sagalete laalchi daganniwa iillanno gede assate loossanni afantannota qummi asse; tini kaayyo sidaamu qoqqowono ko garinni dirritannota ikkase xawisino.
Konni gobbaanni ninkeno konne qarra sufotenni tirate biironke gede konne laalcho laashshitanno laashshaano ledo xaadooshshe kalanqe laalchu qoqqowo e’’anno gede assatenni xa kalaqantino xiiwo ajishate loonsanni hee’noommo yinohu sooreessu; laalcho maaxxannore seeriweelo daddalaano uurrinsoonni wolqa widoonni assinoonni qorqorshinni kiirotenni xawinsoonnikki Zayite amandoonnita egensiisino.
Jeefoteno sooreessu baalanti dagoomu bissa laalcho maaxxe dagate heeshsho aana mitiimma kalaqqanno daddalaano badatenna seeru qaafo adhate assinanni sharrora qoteho uurritanno gede xa’mino.
Qiddist Gezaheny
Bakkalcho Badheess 8, 2014 M.D
