Hawaasa:- Saihu IHADG gashshooti yannara gobbankera shoole paartete uurrinshuwa calla gobbate hajo daafira muro sayissanni keeshshitino ha’rinsho sooranteenna baalanti Itophiyu daga gobbansa hajora beeqqaano ikkitanno ba’re kalaqamasenni hagiirraamma ikkitinota Hawaasi Quchumi teessaano xawissu.
Hedonsa Itophiyu Pireesete uurrinshara uytinori Hawaasi Quchumi teessaano, Seeda yannara duucha Itophiyu daga gobbansa hajo daafira beeqqitannokkiha xiiwante keeshshitino gede qaagiissite; xaa yannara kayinni Jireenyu paartenni hakku baalu soorrameenna baalunku Itophiimmasi callatenni gobbasi hajora beeqqaancho ikkanno ba’re kalaqamase hagiirsiissannote yitino.
Hedonsa uytinori Quchumu teessaano mereerinni Dr Naasir Awwolihu; albaanni roduuwa paarte uurrinshubba yine woshshinanna keeshshitinori xaa yaannara miilimmatennino sa’e gumulsiisaano bissa ikkite leellansa Jireenyu Paarte leellishshino hala’ladimma ikkinota coyi’rino.
Jireenyu Paarte songote gumulora fushshitino uurrinshate xawishsha lainohunnino uurrinshate bixxille yannase agadhitinonna hasiissannota ikkitino gede hedosi uynohu Dr Naasiri; ikkollana tini qarrubba mitto hashsha kalaqantinota ikkitukkinni 27 diriranna hakkuyno alba hanaffe gongo’mitanni dagge Jireenyu Paarte aana ubbino. Qarrubba tirate politiku murci’raanchimma hasiissanno yino.
Daga uytinonsa biilloonye seerimale horonsi’ranna mootimmate biillonye golo assidhino mooraanchimma aana ka’ino hedo lowo geeshsha danchate yitanno ammano nooe yiinohu Dr. Naasiri; konne callano ikkikkinni heeshshote qadha ledo amadisiisante ka’ino hajubbano yanna uynikkinni tira hasiissannota qaagiissino.
Woluno hedosi uynohu Hawaasi Quchumi teessaanchi Kalaa Wodaamo Waajjeebbohu coyi’ranni; sai gashshooti Onte Uurrinshubba qacce qole xiiwe Shoole Uurrinsha calla gobbate hajo aana gumulo sayissanni keeshshitinota qaagiisse; xa kayinni baalu mittimmatenni Itophiya lawanno garinni tantanamanni noo gede coy’rino.
Jireenyu paarte xa daga hasidhanno garinni tantanantino; aane gatinoreno loossanno; dagano konne la’ara agadhitanni noo gede coyi’rinohu Kalaa Wodaamo; xaa geeshsha noo ha’rinshono dancha ikkitino gede kule; baaluri mitte hige taalanno yaana hoongirono gedensa ilamankera dancha hexxo heedhanno yine ammanneemmo yino.
Bainchu assootinna mooru seeda yannara rumuxxe buddeena afi’nanni doogo lawa geeshsha illinono ysinohu Kalaa Wodaamo; kuni assooti xa hananfoonni raginni qaafo adhinanni ha’niro shotanni ha’ranno yee hedeemmo yee; konne taashshate kayinni Paarte calla ikkikkinni baalunku beeqqo hasiissannota coyi’rino.
Daga Jireenyu Paartewiinni lowore agadhitanno gede qummeessinohu kalaa Wodaamo; Jireenyu Paarte baalanka beeqqaancho assino garinninna daga qarrinoe yite kayissanno xa’mora dawaro qoltanni su’misentenni gede jireenya abbitanno yine agarreemmo yino.
Addisu Adoola
Bakkalcho Badheess 8, 2014 M.D
