Xaa yannara noohu diilallote gade soorrama korkaatinni Sidaamu qoqqowuirano miteekke moolle kalaqantuha ikkiro nafa aantanno sase agannara saadate shiqisha dandiinanniti ikkado saadate sagalimmara hossanno hayisso agarooshshe worreenna afantannota qoqqowu saadate jiro latishshi biiro sooreessi kalaa Tekle Jomba Itophiyu pireesete uurrinsha xawisino.
Qoqqowoho moolle kalaqantara dandiitanno yine hedano hoongiro; iibbillu lexxanni dayno korkaatinni wolootta qooxeessuwara kalqantino moolle hedote giddo woratenni saadate sagalimmara ikkannore laayyote loosi ledo latinsanni gobbanke miinjira hexxo assi’nanniti saadate ceatto loossanke gufissara dandiitanno moollera anga aa dinonke yino.
‘’Gobbankera yanna baala kalaqantannoti diilallote akati soorrama roorenkanni saadatenna mu’rote aana jawa gawajjo iillishshanni afantanno; konni korkaatinnino Oromiyu qoqqowira Booranu zooneranna Somaalete qoqqowirano hattonni kalaqantino moollenni saadate jiro aana jawa gawajjo iillitino’’ yinohu kalaa Tekle; Booraanu zoonera moolletenni gawajjantino qooxeessuwara Sidaamu qoqqowi saadate sagale irko assinota qaagiissino.
Sidaamu qoqqowirano Daraaraho, Hawaasi gaangaawira, Bilaatte, Borrichahonna Lokka Abbaayyu woraddara laayyote loossa ledo saadate sagalimmara ikkitanno hayisso laashshinanni hee’noonnita qummi assinohu sooreessu; xaa yannarano miteekke qarru kalaqamiro aantanno sase agannara ikkadu garinni shiqishate dandiissitannoti saadate sagale qixxeessinoonnita qummi assino.
Saadate sagale latisa mitto ragaanni saadate lubbo gargaratenni baatto loosidhenna sada ce’e galtinore gumaamma assannoha ikkanna wole ragaanni kayinni qansootahono loosu kaayyo kalaqate jawa qeecha afi’rinota dea dihasiissanno yino.
Mitto kuntaala saadate sagale 4700 birri ale ikkino waaga fushshannota qummeessinohu kalaa Tekle; babbaxxitino hayyonni saadate sagale laashshatenni eote Bueno lossi’ra dandiinannitano xawisino.
Yaareed Getaachew
Bakkalcho Badheess 8, 2014 M.D
