Addisi Ababa:- “Daganke huluullote giddora e’anno gede assanni nooha keere hooganna miinju qarra tirannoha kaajjado amanyoote kalanqeemmo” yee Jireenyu paarte layinki Pirezidaante Kalaa Demmeqe Mekkoninnihu coy`rino.
Jireenyu Paarte Layinki Pirezidaante Kalaa Adem faarah isi widoonni, paarte afuunni coyra calla ikkitukkinni hakiinni saino looso loossanni noota kule, 10 kumenna 658 massagaano aana qaafo adhinoonnita xawisino.
Jireenyu Paarte songonna mereerima komite gambooshshi aana sa`ino gumulo lainohunni Jireenyu Paarte Layinki Pirezidaantooti mitteenni xawishsha uytino.
Hattenne yannara Kalaa Demmeqe Mekkonniinihu xawisinonte gede, daganke huluullisanni nooha keere hoogatenna miinju qarra tirannoha kaajjado amanyoote kalanqeemmo.
Keerunna ge`nete raginni konni gedensaanni yanna yannatenni qansootu reyonna darama macciishinanni sufa dihasiissannonke yiino.
Dagate aana barru baala iillitanno dano hajo biddi assa hoongummoro ayii dancha qaale giggishinummorono; wodananke kassi di assanno yiinohu Kalaa Demmeqe, 10 miiliyone ikkanno qansooti mannunna kalaqamunni kalaqantino danonni daramino.
Wole widoonni daga Goojjaametenni Dejene ha`rate qarrante noo yannara, qoleno jawa miinju furcho ikkite owaante uytanni nooti Booranu doogo ge`e hodhishshu looso lossannokki gede assinanni hee`noonni harinshono soorrama noosi yiino.
Wole widoonni babbaxxino qooxeesira hattono Addisi Ababaho keere gibbanno wolqa dagate yaaddo ikkitannokki gede assanna cancishaanote ledo assinanni ola galcha hasiissanno.
Konnirano kaajjado massagonni daga horaameeyye assano looso loosate qixxaawo assinoommo yiino.
Albi waritinna tenne yannati sa`noommokkiti qarruba heedhuro, xaano haaro ikkite kalaqantanni nooti qarrubba noonke; Konne shuqunanno raga harunsa noonke yiino.
Baalunku raginni qansoota gatisate kaajjado looso loosa hasiissannonke. Hegersino keere gatamarate dagate annuwa ikkine loosa noonke. Keere abbate kaayyonna dhukuno noonke dagaati.
Konne looso halaalunni loossanno massagaano bobbaasa hasiissannota xawisino. Konne Mereerima Jreenyu Paarte hasaabbe gumulo saayissinota egensiisino.
Wolu kayinni, daga caacceessitino hajo baxxinohunni, owaante aate qarrinna, mooru ledo amadantino hajubba, baattote widoonnu biiloonye amadde noori daga kawanna ka`a dassitanni tootayeessa soorrama hasiissannota Paarte gumultinota xawinsoonni.
Tenne yannara dagoomu xaadooshshi, afoo hasaawe sumuu yaanna woxunna biiloonyu xaadooshshino busha asoote saaysate doogo kalaqinotano coy`rino. Babbaxino qooxeessiranna quchummara daga hajo gudisiissirate hasidhuro woxe, afoo xaada, gosate xaadooshshinninna biiloonye horoonsidhe caaceessitanno.
Konne biddi assa qara loosonke ikka noosi. Konne soorrate gaadanna danchu amanyootu hasiissannonke. Qarra tira hoongummoro ninke hendeemmohu danchu coy guma diabbanno yiino.
Buxicho jiffaani noota heeshshote iibbille woy daga heedhanno gede assate loosa hongummoro, gumu didaanno.
Jireenyu Paarte deerrinni assinoonnihu umi gambooshshi aana hasaanboonnihu maykiro ikkoonoomete aana borreessamanni nooha calla guma coy`nanni buxicho daga heeshsho woyyeessa hoongiro soorro diheedhanno qarruno fulannokkita coy`rino.
Mereeroho hee`re xa`mannokkihunna biiloonyu barcimi diro kiirsiisatenna seedisi`rate hasidhanno gedee massagaano kayinni adhamooshshu noonsakkita egensiisino.
Kalaa Demmeqe egensiisinonte gede, Paarte hasidhanno soorro garinni qarra tiratenna massagote qeechasi mitte mittenete mootummate tantanora loosu aana hosiissa no.
Paarteno konne gumulsate massagaano bobbaasa hanaffino. Konnira, meessi macciishshammenni xeerti`ne hasiissannoha massagaanote ogimmanna egenno udi`ne loosa hasiissanno yiino.
Jireenyu Paarte illacha assite hasaabbinoti gobboomu guffa konni albaanni kaajjado paartete tantano nookkihura, mooru, owaante aate ayyaana hooga, keeru anjenna gea hooga, moolle qansotu rewo, darama, kaajjado dipoloomaasete loosonna babbaxitino hajubba aana hasaawa assinoonnita xawisino.
Jireenyu Paarte Layinki Pirezidaante Kalaa Ademe Faarihu isi widoonni, qaalunni sa`ne loosu aana hosiisate qaafo adhine paartete umi songo qorqorshira 108 kumenna 258 massagaano aana hasaawa asse 10 kumi 658 massagaano aana buuxo assine babbaxitino qaafo adhinoonni.
Gobboomu deerrinni Babbaxitino qaafo adhinoonni 10 kuminna 658 massagaano giddo 2 kuminna 574 biiloonyunni ka`anno gede assinoonnita egensiisino.
Gattino massagaano aana qolle deerrinsawinni worora dirrinse shotanna kaajjado qorophiishsha uynoonnita qummi asse, basete soorro assinoonni massagaano nootano xawisino.
Loosu gumansanna ikkadimmansa, akatensa, ammanamansa hattono woloota safaraacho horoonsi`ne massagaanote aana qorqorsha assinoonni.
Qoqqowubbate eeli geeshsha noo tantanora mixo qixxeessinenna hasaanbe qooxeessaho noo qarrubba tidhantanno gede raga worroonnita xawinsooni.
Paarte tungoonninsaha qeechansa ikkadimmate fultanno gede dandisiisanno qorqorsha assite babbaxxitino gumulo saayissino.
Dagate xa`mo qoltano gedee qaafo adha albilichono suffannota qummi assino.
Abrahaam Saamueel
Bakkalcho Badheess 8, 2014 M.D
