Affaarete daga mereeronsa kalaqantanno gaance tidhitannohu budenna rosamino seerinna wodho noonsa. Konne hooroonsidhe yooaanchimmate looso loosse farco uytanno.
Qarrinsara dawaro uytanninna gaance gargartanni dagate giddo keerenna aga`labbo batisatenni barru loosonsa mitiimma nookkiha gumultanno. Seeda diro amadante heedhino heeshshonsa, budensanna gadensa, amma`note ledo amadisiisse budunni gaance tirate hayyo loosu aana hosiissate giddose babbaxino garinni kalaqantanno gaancera halalaanya yoo aate hattono daga keerunna co`o yiino garinni mittimmansa agadhite e`e fulate dandiisinonsa.
Yooaanchimmate amanyootinsa dagate giddo noonsa egenno, dandooshshenna hayyo daga uytanno ayirrinyu deerrinninna jawimmanni doorantanno gobbate geerrinna dagate massagaanonniti.
Affaarete daga giddo kalaqantanno gashshootunna farcote hajubba massaganohunna gumulsannohu Sulixaaneeti Farcote Uurrinshaati. Sae sae Sheriu seeri isiliminnu amma`no amanyootinni daggano hajo calla la`nno.
Jawa hajo hasiishshi deerrinni la`e babbaxitino geerrinna massagaano farco woy gumulo uytanno. Affaarete Qoqqowi Mootumma Budunna Turizimete Biiro fushshitino taje garinni, bud seerinni mannu lubbo hunate hajo woy mundee qolate 100 gaala woy konni ledo taalo waaga fushshannoha wole qoricha tungannita xawissanno.
Konnira, jaddote dani gede gumullonni qorichu baalaho hunote danira tittirshunni fushshinoonni qorichi dani no. Affaarete hornyi mereeri giddo mitte “Faiima” yinannite. “Feiima” jawaatu labballi gamba yitanno gaamo su`mmati.
Feiimma giddo noo miilla keerenna ga`labbo ayirrisiisate, yoo aate woy gumulate, dhiwaminoha irkisate, wosina adhatenna jilahonna labbanno ayyaannara looso kaa`late hattono madaarshu yannara waamma qixxeessatenni amuraate harisate loossanno.
Mitte mittente gosa jawaantensanninna jawimmansanni doorantino labballo wedellinna jajjabbu gaamonni “Feiima “xintinanni. “Feiima” yineenna egennantinoti Affaarete daga gaamo tantano mittu manchi dhukinni loonsannikki loossa halamme shota assate, dagate miilla horoonsidhanno budu dagoomi gaamo tantanooti.
Loosu beeqqaano loosu gedensaanni mittimmatenni itanna agate amuraatino noonsa.
Dagate dagoomu mittimma kaa`lonna qarru yannara hasiissannoha fushshate qarra ikkinoha tirate woxunni, wolqatenninna amaalatenni addi addi irko assitanno. Dagate giddo dhukiweelo ikkinoha woxunninna wolqatenni irko assinanni. Jilu noo yannarano adhara kaino wedellichira xaadannosiha ayii qarra tirate gaamo woxe fushshite owaante uytanno. Meentuno uminsaha qeeha fulate “Feiima”
xintidhanno. Kuni meentu Feiima, meentu noonsaha mini giddo uduunnenna woxu qarra tirate miilla woxe fushshite balaxo hasiissanno coye balaxisiisse mimmitu ledo kaa`lantanno hayyooti.
«Feiima” iddirete gedee tantano labbannoha ikkiturono, Affaarete daga kaa`lamate budinsa woluwiinni baxxanno. Umsihu budunna wodho noosi. Affaarete daga giddo “Feiima” yinanni woyte meentunna labballu dikarsantanno. Labballoho uminsahu Feiimu noonsa; meentohono hattonni.. Techo geeshsha Affaarete dagara budesi seeda diro keeshshinohonna albi annuwanni sa”anni daynoho ikkinota Feiima gaamonna Affaarete daga kultanno.
“Feiima” miillate gaamooni afamishsha uyneenna mimmito kaa`lamatenna irkisamatenni qarra tirranni budu hornyaati. Feiimara daga doortinohu gambisaanchu hee`rannonsa. Gambisaanchunni amanyoote agadhinokki miili qorichamanno.
Konnira, miilla amuraatehonna wodhote hirantanno. Affaarete daga giddo hammaata Feiimu gaamo nooha ikkanna, ayi daga miilla doodhtino Feiimi gaamora eate qoossosi agarantinote.
Coyella ikkkiro, alba noo gaamonni wole Feiimu gaamo widira eate albaanni albi gaamowiinni fulate korkaata ikkinosire afisiisa hoogiro wole gaamo diadhitannosi. Alba assine xawinsoonnite gede, Feiimu labballunnihanna meentunniha ikkasi aleenni, mitto Feiima wolu feiiminni badate harinsho dino.
Meentoho uminsa wodho noonsa; labballuno hattoni. Meentu Feiimi wi`latenna jilu yannara may dani noosiro la`neemmo woyte, mannu reyaanno yannara “Feiima” woshshinanni.
Tenne yannara baxxinohu uddirate budi no. Wi`late minira daanno meenti baalu dananchonsa shaashetenni diphanno; mulla angani didaganno. Shiirino mani mitte fulono fushshirannokki gedenna Feiimu konne baalare assa dandaannota leelishshate mitore haa`re daanno.
Jilu hee`rirono Feiimu widoonni woshshatto assinanni. Jilahonna adhanna adhamate yannara faarsinanni faarso woy sirba sirbanno. Sirbu yannara Feiimu gaamo sirba hanaffukkinni ayino disirbanno. Balaxe sirbannohu heriro qoricha adhanno.
Sirbu yannara fiixunna firu widoonni uynanni afansha gama mushshurraho, woy mushshrru amara uynanni. Koninni lede, “Feiimu” jawa ayirrinye afi`rino daafira jilu yannara miillate qixxeessinanni sagale baxxitinote.
Meentu Feiimu bude agarsiisate widoonni jawu qeechi noosihura, ayi Affaarete daga ama anera injannoe woy sumuu yaannoe yitanno Feiimi giddo tantanama dandiitanno. Kuni Affaarete daga xaadisanno hornyaati.
Ayimmasi xawishsha ikkinota haamata daga coydhanno. Ikkinohura, kuni jawu budi jajjabbu manni sa`u kiironni budu xeikkinni hiitto ilamate sa”ara dandii yitanno xa`mo ka`ara dandiitanno.
Harinshote aana wolu budi ledo karsame ba”ara dandaanno daafira “Afuu amadinohu ba”anno; woraqatu amadinohu diba”anno” yinanni yaatto noohura, la`anno bissa kuni budi karsame ba”annokki gede assate qeechansa fula noonsa; ninke sokkaati. Keeruni!!
Abrahaam Saamueel
Bakkalcho Badheessa 1, 2014 M.D
