Addis Ababa;- Sidaamu dagoomu qoqqowira daga uytinonsa eeggo garunni fultinokkiri 384 mootimmate loosu massagaano aana poletiku gumulo sayinsoonnita qoqqowu jireenyu paarte borro mini egensiisi.
Poletiku gumulo sayinsoonninsari mereerinni 146 massagaanchimmatenni kayinsoonniha ikkanna 238 ikkannorira qorophishsha uynoonni.
Qoqqowoho ‘’Soorramme Gobbano Soorrate’’ yitanno hedonni harinsanni keeshshinoonnihu paartete massagaanonna miilla dhuka gatamarate qajeelshinna keenote ba’reno sa’u lamalara gumulantino.
Xawishshisinnino; qansootu ayirrinye agarsiisate uurra; boosaallimmanna mooraanchimma tiyyi’ne giwanna gargara; taalo ikkitino horonsi’raanchimma buuxisatenni ledamatenna mittimmate hedonni gobbanna daga lossa jireenyu paarte amaddino jawa ajuujaati yino.
Konninnino qoqqowu giddo deerru deerrunkunni afantannore 2 kume 490 loosu massagaano lainohunni shiqqinonsa tajenni irkinse keenatenna dagate soqqansho qaccera qolte aguratenni uminsa hasattonna bainchu assooti giddo burduuqantinowiinni fultanno gede keenate looso loonsoonni yino.
Konni garinnino danchu gashshooti qarra kalaqatenni; gosoomittetenni; muishshunna mooraanchimmate assooti giddo angansa noota bandoonniri 384 loosu massagaano aana poletiku gumulo sayinsoonnita buuxisino.
Konnirano ledotenni seeru garinni qaafo adha dandiinanni gede amanyootu xe’ne noonsare baddanno gede seeru allaalshinni, poolisetenna wolootu bissanni filantinore qorqorshu wolqa tantannoonnitano xawisino.
Aanteteno paartete amanyootinna hornyuwa ayirrisse daga ayirrissenna ammanamatenni owaattannokki massagaano paartete ledo ha’ra dandiitannokkire ikkansa buuxisino.
Qoqqowoho woraddatenna olluubbate geeshsha deerru deerrunkunni harinsoonnihu dhuka kaajjishate qajeelshanna keenote ba’re dagatenna paartete miilla beeqqono luphiima ikkitinota kalaa Abrahaami lede xawisino.
Sooreessu xawishshi garinni; Jireenyu paarte albillichono loosate amaddino mixo latishshunna poletiku loossa guuntera xo’annokki dhukaati yino.
Qarrubba sufino garinni tirateno qansootaho loosu kaayyo kalaqa; wedellu dhuka gatamara; egennonna ogimma garunni horonsi’ranna labbino hedubba aana gutunni sumuu yinoonnitano egensiisino.
Duuchanta kaayyo garunni horonsi’ratenni qaddo ikkitino loossa gumulate kaayyo uynoonninsari massagaano bissa dagate ledo halante hasi’noonniha Jireenyu widira reekkamate animate yawonsa garunni fultanno gede duu’re huwachishinota Itophiyu Odoote Owaante odeessitino.
Amsaalu Felleqe
Bakkalcho Badheessa 1, 2014 M.D
