Amsaalu Felleqe
Addis Ababa;- Xa noo ilama albi awurrana akaakka loossino dhaggenni naaxxatenni sa’e latishshunni, gobba lossatenni, keerenna ga’labbo agarsiisatenni, dimokiraasete amanyoote gatamaratenninna yannaasincho hayyo lossatenni uminsa Adiwa loossara hasiisanno yaanni Gobbaydi hajo ministere qaalu saysaanchi Ambaasaadder Diina Muftihu xawisi.
Ambaasaadder Diina be’ro ayirrinsoonniha 126kiha Adiwu qeelle ayyaana lainohunni Itophiyu pireesete uurrinshara uyno xawishshinni; gobboomitte amaalamme yannara hedote badooshshe keeru doogonni tiratenninna mittimma kaajjishi’ratenni tenne yanna ilama uminsa Adiwa loosa noonsata coyi’rino.
Akaakkanke Adiwu oli yannara qeellete iillitinohu jawu korkaati afuunni, ga’retenni, amma’notenninna wolootta babbadamooshshe kalaqqukkinni gobbansa hajo daafira mittimmatenni uurransa ikkinota xawisinohu Ambaasaadderichu; xaa ilamano konninni rosicho adha hasiissannonsahu gobba lossate; dimokiraase halashshatenna mittimma kaajjishatenni xaa yannara la’nanni babbadamooshshenna qarrubba gobbankenni hunate yino.
Adiwu qeelle yaa Itophiyu dagara kadote gashshooti umikki yannara qeelaminoha ikkasi leellishshino qeelleeti yinohu Ambaasaadder Diina; Adiwu qeelle Itophiyunni sa’e kolidda daga wolaphonsara assitanno millimillora jawa lawishsha ikkinoha dhaggete ikkitooti. Tenne qeellenni kakka’eno wolootu Afriku gobbuwa kadote gashshootinni umonsa wolassitino yino.
Tini ilama albi akaakkansa mereeronsa babbadamooshshu nookkiha mittimmatenni uurrite assitino sharronni abbitino qeellenni naaxxatenni sa’e gobboomitte mittimma kaajjishate assinannai amaalammera agarranninsa qeecha fultara hasiisannota huwachishino.
Bakkalcho Ammajje 24, 2014
