Cancishaano HWHT Affaarete qoqqowira Kilbeti Ressu Zoonera iillishshino layinimeeshsho ganonni Berehalle daramaano fooliishshidhino basera noori 34 kumi 246 Eertiru daramaano noo kaampenni daramansa daramaanotenna dartetenni higginori owaante Samaru sini borro mini egensiisino.
Gaamo daramaanote kaampe aana Fantino luphiima ganonni Onte daramaano lubbamansanna batinyootu madidhinota xawisino.
Sinu borro mini qineessaanchi kalaa Faasili Gaashawuhu baxxinohunni Addis Zemeni Gaazeexira xawisino garinni ; cancishaano HWHT Affarete qoqqowira Kulbeti Ressu Zoonera afantanno Onte woraddara layinkimeeshsho gano iillishshu yannara tenne basera afantannoti Berehalle daramaanote kaampe ganote illacha ikkitinohura luphiima mannoomittetenna uduunnu gawajjo iillitino.
Cancishaano HWHT tenne kaampe aana iillishshino gano kalqoomu daramaanote wodho xiibbannote yinohu kalaa Faasili; mitte qodhitino wolqa basete nookkiha togoo gano iillishansa dadillissannote yino. Kalqoomu mannooimittete irko assitanno uurrinshuwa hasiisanno garinni irkissanni nookkita coyi’rino.
Kalaa Faasili xawishshi garinni; daramaano akkimale gawajjo iillitunsakkinni mootimma gobba giddo daramaanonni taalo dandiitanno irko assitanni afantanno. Aanteteno kuri wirro darantino qansoota mitte basera gamba assatenni irko assate Serdo qooxeessira daramaanote kaampe qixxeessinanni hee’noonnitanna mitte lamala giddo mittu qooxeessira gamba assatenni irko afidhanno injoo kalanqannita coyi’rino.
Berehalle daramaanote kaampenni darante Samaru fooliishshi’nanni basera afantanno daramaano cancishaano gaamo wirro gano iillishshu yannara insa kaima assitino gano iillishshinota coyidhanno.
Lamu agani danqa adhite Berehalle daramaano fooliishshidhanno basenni darantinoti dukko Jemiila Haseniti yitanno garinni; cancishaano gaamo daramaanote kaampe aana hashshihunni Honse sa’’aatenni luphiima gano iillishshe akkimale gawajjo iillishshino. Iseno Lamu agani danqa adhite lee barra hodhite Semera e’inotanna xaa yannarano wole lee oososenna maatese mama nooro affinokkita coyidhanno.
Samara e’unkunni lame barra ikkinoseta kultannoti dukko Jemiila; hodhishshu iillishinose daafuri fulinosekkitanna konni aleennino cancishaanote kakkacha gano qulli yitanni yaachishshannoseta coyidhanno.
Wole daraamncho dukko Ayisha Mehammediti ise widoonni; cancishaano HWHT kaampete aana iillishshino ganonni masillaabbe shiima qaaqqose adhite lekka massituwa xooqase xawisse; xaa yannara minaannisenna bayiriidi qaaqqise mama nooro affinokkita coyidhanno.
12 dirrara Berehalle daramaanote kaampera keeshshinota coyi’rannohu Mehammed Yaasinihu isi widoonni; cancishaano kaampete aana Fantino luphiima ganonni batinye daga lubbantinota kulanno. Mehammedi yaanno garinni; gaamo yannate kaampe qara illachansa assidhe luphi yino garinni gantino. Tenne yannara lubbantinorinna madidhino daga no; konni gobbaanni gamu doogo sodhe badhera higginorinna gaamotenni murante gattinorino no. ilaallateno heedhanno.
Borrote mininni afi’noommo mashalaqqe leellishshanno garinni; Itophiyaho 25 daramaanote kaampera mitte Miliyoone ali daramaano afantannoha ikkanna kuri giddonni Affaarete qoqqowira lamu fooliishshi’nanni xaawira 61 kumi 200 Eertiru daramaano afantanno.
Bakkalcho Ammajje 24, 2014
