Qiddist Gezaheny
Wo’mante Itophiyu daga mittimma, murci’raanchimmanna worbimma leeltino; koliddu daga sharronna jawaante qeelletenni jeefantino; borojjimmatenni shettino koliddu dagara wolaphote doogo fiinohu 126ki Adiwu qeelle ayyaanira hawalle keerunni iillishinonke yaanni Sidaamu qoqqowi pirezidaantichi kalaa Desti Ledamohu dancha halcho sokka saysino.
Pirezidaantichu Aduwu qeelle waajjuullu aliidimmanna kadote gashshooti amanyoote jawaachishshanno Awuroppu gobbuwa saalfachishshinotenna masissino; Itophiyu gobbanke ayirrinye agarsiissino; dagatenna dagoomu mittimmanna worbimma leeltino; Afriku daga qeelaanchimmate buqqee gotti assitinota ikkase coyi’rino.
Awuroppu daga kadote gashshooti wodho amadde Afrika bebbeeqqitanno woyte Xaaliyu kayinni Itophiyu daga kadote gashshooti hundaanni guluphisiisate horrinoha ikkirono didandiino yinohu pirezidaantichu; kuni ikkinohu annuwinke wo’munku Itophiyinni gamba yite mittimmatenna murci’raanchimmatenni hattono worbimmatenni assitino sharronna baattino kakkalonniiti yino.
Adiwu qeelle kadote gashshooti amanyootinninna borojjimmatenni shettino Afrikunna kolidda daga sharro qeela dandiinannita hexxo amaddannotanna wolaphonsara sharrantanno gede dandiissino qeelle ikkase kalaa Desti Ledamohu coyi’rino. Techono tini ilama yannaasincho kadote gashshooti amanyoote qeela dandiitannohu buximanna duumbara gata qeelatenni gobbanke jireenyu birxichira iillishshurooti yino.
Woriidimmatenna borojjimmatenni shettino kolidda dagara goxxinowiinni baqqi yitanno gede Adiwu qeelle baqqeessa ikkitinotanna Paan- Afikaanizimete hedo hala’litanno gede safo ikkitinota coyi’rino.
Techono Awuroppu gobbuwa Afrika dana soorrite kadote gashshooti hundaanni hosiisate Jio Politiksenna miinjunni Niyo-Koloniyaalizimete amanyootinni guluphisiisate hala’ladunni, xawo ikkinokki garinninna xawoho loossanni noo hajo ikkase kalaa Desti xawise; kunino muli yannanni cancishaano HWHT gobba diigate hedo gumulsitanno gede xawo ikkinokki garinni kaa’litanni keeshshitinotanna ‘’NO MORE’’ gaadinni wo’manti Itophiyunna Afriku daga mittoonsitinotenna qeelama hooga leellishshinota ikkase xawisino.
Xaaliyu techoo 126 diri albaanni Itophiya horre guluphisiisate assino olinni qeelama baraare higino; Itophiyu daga jawaata cigilenni shollino barra ikkasinni techoo barra ayirrinseemmo woyte annuwinke sharronna qeelle ninke oosonsara baattinota muxxe kakkalo ikkasenni lowo ayirrinyinni kula hasiissannonke yaanni pirezidaantichu huwachishinno.
Bakkalcho Ammajje 24, 2014
