Addisu Adoola
Hawaasa: Adiwu ayyaani qeellenke barra ikkinohura lowo geeshsha tashshi yaannonke yaatenni Ejjeetto xawissu.
Hedonsa Itophiyu Pireesete Uurrinsha uytino Ejjeetto Aduwu ayyaani Itophiyunnino sae Afiriku deerrinni koliddu wolapho fultino barra ikkinohura tashshi yaanonke yitino.
Baabba Fiqirte messeleti coydhino garinni, albi annuwinke tenne qeelle lekkatenni hadhanni hudenna gooro qeeltunsakkinni amaxxotenninna bisetenni sharrante abbitino qeelleeti; teni qeelleno Itophiyu dagara mayinnino aliidite yititino.
Techono ninke tenne qeelle sufisiisate gosanna amma’no bandummokkinni albi annuwinke mittimma fulte Adiwaho Xaaliiyaana mikitte abbitino qeelle techo ninkeno kainonke gobbaydi diinanna giddo soqqamaasine annuwinke gede mittimma ka’ne qeela noonke yitino.
Amadisiissenno Baabba Fiqirte, techonni Xibbuunna Lemiina Leewu diri albaanni gobbanke horrara daynohu xaaliiyaanaho; techo kayiinni buximate. Tenne buximano meyaa labbaaha yinummokkinni annuwinke xaaliiyaana qeeltuntenni gede ninkeno gaarammenna sharramme buxima qeelle fula noonke yite coydhino.
Wolu hedosi uynonkehu Zerfu Woldetsaadiiquhu, Aduwu qeellera annuwinke mayinnino anga diuyneemmo yaatenni mittimma kaajjado sharro assite qeelle ilamate tareessitino gede coy’re; techono ikkiro tini ilama tini gobba mulla shotu garinni dagginota ikkitinokkita affe mittimmansa agarsiisse hedote badooshshe hasaawunni tirte tenne gobba ilamate tareessitara sokka’ya sayseemmo yiino.
Woluno wedellichu Iskaawut Iyyaaderu Isheetuhu isi widoonni, Aduwa yaa qara gede Itophiyaahono ikkiro xaphoomu Afirikira wolapho, bareendenna naaxxilleho yee; Itophiyu qansooti heedhu gobbara baala haxonsa gotti yite hadhannohu hakkawaro bareedda annuwanke miqichonsa hiinqante mundeensa dunte horraancho Xaaliiyaana amaxxotenninna bisetenni qeelte shorransanniitina Aduwu yaa anera mayimmate yiino.
Adiwu wari sharro kadote gashshoote giwate sharrooti yiinohu Wedellichu Iskaawut Iyyaadderu, hate sharrono bareedda annuwanke mittimma gaadansanni qeelletenni sa’ino gede qaagiisse; Xa yanna sharramaano kayinni ninke wellaho; konni daafira xa ninke wedellu gaada noonkehu xaa yannara gobbanke giddo maacciishshantanni noo babbadammenna buximate aanaati ikkonota kaajjishe coy’rino.
Konnirano badhe hinge Adiwa qaaga noonke; annuwinke Adiwu qeellera mittimma gaaddinohu badooshshu hoogeennansa ikkikkinni giddoodinsa badooshshe qacce qolte agurte daynonke horranchu diinira balaxo aatenni ikkinohura techo ninkeno noonkeha giddoodi badooshshe qacce qolle agurre daynonke diina sharramate ka’no yiino.
Jeefoteno wedellichu sokkasinni, wedellu gobbansa baxa noonsa; korkaatuno gobba baxate giddo duucha coyibba soorrantannona yee; baalu wedellino tenne hedonni kairo ga’a gobbanke woyyino darga iillitanno yee ammaneemmo gede qummeesse; konnirano ninke wedellu umonke qixxeessa hasiissannonke yaatenni sokkasi saysino.
Xibbenna Lemiina Leekki Aduwu qaaggo ayyaana addi addi qaraqarira bero barra qaange honsoonniti qaangannite.
Bakkalcho Ammajje 24, 2014
