Adiwu qeellera jawu korkaati daganke gobboomu hajo daafira noonsa kaajjado mittimma ikkinota dhaggete rosiisaanchi Abbaabbu Aligaaz coyi’ranno.
Bi’re Xaaliyaanu Itophiya kadotenni gashshate ka’u yannara horonsidhino hayyo lamente gobbuwa mereero baxillaanchimmate su’minni awaawurre qixxeessinoonnita ‘’Wucaale wowe sumiimme’’ shiqqu gedensaanni Atse Miniliki tirote aana huluullamino daafira wowe Itophiya gawajjitannota ikkitinohura Xaaliyaanu afoo dandiitannorinni tirsiise wowe diigino; yaanno kalaa Abbaabbu.
Adiwu qeelle afi’neemmo gede hattenne yannara gobbate gashshaanchi Atse Miniliki saysino sokka macciishshitu qansooti baalunku timbiliqqi yite fulteeti gobbansa daafira olantinohu. Konninni la’neemmohu Itophiyu daga gobbansa ayirrinyinna wolapho daafira mittimmatenni ikkite dawaro qoltinotaati; yaanno kalaa Abbaabbu.
Hattenne yannara Xaaliyaana qasate gobbankenni duuchunku qooxeessinni fule dirame qasaminohuno ikko albaanni sa’e olanturira irko assihu baalunku qansichimmasi qeecha fulatenni naaxxissanno qeelle afi’nanni gede assitino.
Tini qeelle shotu garinni dagginota ikkitukkinni qansootu kakkalanteennaati yaannohu kalaa Abbaabbu; gobbanke meexara qodhe dayno diina daganke mittimmatenni ikkite harancho yanna giddo olamatenni diinunni gargarte ayirrado gobba ilamate iqqitinota coyi’ranno.
Albiri Itophiyu qansootiwiinni adhinoommo rosichi gobboomu hajo daafira mittimmatenni ikkite sharrama ikkinohura xaa yannarano duuchu ragaanni gobbanke diigate ka’anno diinna mittimmatenni ikkite sharrantanno. Kuni albillichono ilama kaajjishshe sufissara hasiissanno bareendeeti yino kalaa Abbaabbu.
Woloottu Afriku gobbuwa hattenne yannara kadote gashshooti giddo ubbinohu sharramate wolqa hoogge ikkikkinni giddoydi mittimma noonsakki daafiraati. Gobbankera Adiwu qeelle dagganno gede jawunna mittichu korkaati daganke mittimmaati. Konnirano daganke mittimma hundinni kayisse gobbansa hajo daafira mittimmatenni ikkite sharrantannohu gashshaano gadachishsheenna ikkikkinni uminsanni gutu hajonsara mittimmatenni halantanno daga ikkansanniiti.
Kalaa Abbaabbu amadisiiseno; dhaggensa seekkite affinokki ilama ayimmansano afate shettanno; konnirano hundinni amadisiisante daggino dhagge seekkite huwatate Adiwu qeellenna labbanno dhagge seekkite amadde ilamate tareessa hasiissannotano huwachishanno.
Bakkalcho Ammajje 24, 2014
