Uurrinsanni hee’noonniti gobboomu amaalete ba’re qarunni gobbate garinni sumuu yaa hoongoonni hajubba aana sumimme kalaqatenna kipho noowa bande tirate qeechise luphiimaho yino Hawaasi Yuniversite Pirezidaantete borro mini sooreessi kalaa Ayyele Addatohu.
Hattono gobbate keere agarsiisatenna badooshshu aana hasaambe tiro abbate qara doogo ikkaseno huwachishinno.
Borrote mini sooreessi kalaa Ayyele Bakkalcho Gaazeexi ledo assino hasaawinni; gobboomu amaale garunni horonsi’niro baxxinohunni hedote aana xawadimmatenni hasaawa dandiinanni kaayyo kalaqqannota ikkase xawise; yannate noo poletiki aana woyyaabbino soorro abbate qeechise luphiimaho yino.
Konni daafira uurrinsanni hee’noonniti gobboomu amaale gummaame ikkitanno gede qarunni baalanka beeqqisiissannota ikka hasiissannoseta ikka noose yaannohu kalaa Ayyele; mu’ro sayissanno bissa calla hasaabbannota ikkitukkinni wo’manta dagoomu bissa beeqqisiissinota ikka hasiissannoseta huwachishinno.
konni daafira meento, wedella geerranna illacha uynoonninsakkire dagoomu bissa lede baalanka hanqaffinota ikka noose.
Hanqafaanchimmate aana loonsanni woyte qarunni xawadimma hee’ranna balaxote qixxaawo assa hasiissanno; balaxote qixxaawo assinanni woyteno lowo qoropho hasiissannota kayisannohu kalaa Ayyele; uurrinsannitino hiikunni poletiku la’’ooshshinni co’aabbino komishiine ikka hasiissannose; Tenne aanano xiinxallo assa hasiissannota qummi assanno.
Hattono xawado ikkino illachi hee’ra hasiissannota kulannohu sooreessu; mittu qarrira kaimu xawo ikka noosi yaanno.
Xawado ikkitino tantano, xawado ikkino amanyooti, xawado ikkino seerinna harinsho heera hasiissannoseta qaagiissanno.
Gobboomu amaale mootimmate harinsho gobbaanni ikkino garinni loossannota ikkitino daafira mootimmate uurrinshuwa harinsho ledo xaaddannoha ikkironna mootimmatenni massaggantannoha ikkiro dagoomu hasaawa ikkikkinni mootimmate hedo harinsanniwa ikkitanno.
Kuni ikkannokki gede dagate laooshshi noonsarenna gaamote hedonni co’o ikkitino mannooti amaale biso ikka noonsa.
Konni daafira goofimarshu e’’o worre loosa hasiissannota kalaa Ayyele illacha tuge huwachishinno.
Qiddist Gezaheny
Bakkalcho Ammajje 10, 2014 M.D
