Addisi Ababa:- Dagate Riqiwamaano Amaale Mini gobbate tii”inna wolambinatu aana danqara ikkitino jaddo gargarate gobba baalate tungeenna keeshshinoha winnamu yanna lallawo kayinsoonni.
Mootummano noo uurrinshu seerinni ayirrisate amanyoote baxxino garinni illacha tunge loonsanni gede amaalete mini qaagiissino. Dagate Riqiwamaano Amaale Mini umi diri loosu diro umi wiinamu songo Sanyote soodo harisino.
Amaalete mini gobbate tii”inna wolambinatu aana danqaarra ikkitino jaddo gargarate fulinoha wiinamu yanna lallawa kayinsanni gede roortino huuronni kaajjinshoonni.
Gumulote hedo Amaalete Minira shiqishinohu Motummannihu Qaru Woshshamaanchi Ministire Kalaa Tesfaayye Beljigehu, wiinamu yanna lallawa fushshate gadado ikkitinoti ga`labbote yaaddo xaa yannara woyyaabanni noohuranna soorramanni afamanno daafiraati; qoleno qarru kalaqamiro xa noo wolqanni woy uurrinshu gargarooshshinni gargara dandiinanni deerra daynota xawisino.
Konnira, lallawu gumulshu yanna ajishate hasiissannohura ka”a noosita kulino.
Kalaa Tesfaayye xawishshinni, Cancishaano HWHT nna insa gulffannori hunote loosonsa gumulsiisate babbaxtino gobbate qooxeessira keeraano manni aana iillishshino jaddo, horranna wolootuno dagate mannihimmate qoosso aana luphiima qarra iillishshinota xawisino. Ikkollana, gargarooshshu olanto, daga baala, hattono qoqqowunnitinna federaalete ga`labbote handaarubba mittimmatenni halante assitino bareendete loossinni cancishaanchu HWHT Affaaretenna Amaaru qoqqowinni gudisame fulanno gede assinoonnitanna tenne yannara ga`labbote yaaddo wo`munni wo`ma co`o yitino yaa hoongirono, xaa yannara noo ga`labbote uurrinshi seeru ayirrisanni gargara dandiinannita xawisino.
Tenne yannara cancishaanchunna gulufaanosi millimillo ittisate hattono canco gargarate fulino seeru hanqafo, hattono federaalete mootumma qoqqowu mootumma mereeroho eate fajjanno amanyoote gumulanno seeri hanqafo ikkado dawaro aate dandiisisanota Kalaa Tesfaayye Beljigehu qummi assino.
Kalaa Tesfaaye coy`ranni, lallawu sufanno gede assa investimentetenna turizimete aana xiiwo kalaqannohura hattono dipoloomaasete aanano umisiti xiiwo noohura, qansootu mannihimmate qosso aanano gawajjo abbannohura lallawu ka”a noosita xawisino.
Mitu mitu Amaalete Mini miila Cancishaanchu HWHT miqichi hiiqqaminollana madaaroonnkiita xawisse, cancishaano gaamo xaano jajjabbu oli uduunnunni Affaaretenna wolootta qooxeessubbara ola fante keeraano daga darantanno gede assitanni noohura wiinamu yanna lallawi keeshsha noosi yite coydhino.
Lallawu ka”a danchate yite adhitinori wolootta Amaalete Mini miilla, xa noo gargartonni gargarranni baxxino illacha tunge loosatenna noota ga`labbote bidhatto ajishate loosa noota qaagiissitino.
Wiinamu yanna lallawa tugate Ministirootu Amaale Mini xa leeltanni noota ga`labbote yaaddo xa noo seeru ayirrisate uurrinshanni gargarate rakko ikkinohuranna gobbate tii”i aana danqara kalaqino daafira Ministirootu Amaale Mini Birra 23, 2014 M.Diro wiinamu yanna lallawi kiiro 5/2014 aana lallawinoha ikkanna, kuni lallawi Dagate Riqiwaano Amaale Minira shiqe lallawu kiironni 1264/2014 M.Diro kaajje loosu aana keeshshinoti qaangannite.
Abrahaam Saamueel
Bakkalcho Ammajje 10, 2014 M.D
