Addis Ababa;- Gobbankera albillicho hasiissannota jajjabba industurra safate kaima ikkitinore laashshaano interpirayzoota garunni irkisa hasiissannota Itophiyu Interpirayzootu latishshi qara dayrektere ikkinohu kalaa Birru Woldehu egensiisi.
Kalaa Birru baxxinohunni Itophiyu pireesete uurrinshara uyno xawishshinni; Itophiyu interpirayzootu latishshi uurrinsha konni albaanni shiimmaaddanna mereerima laashshaano calla irkissanni keeshshitinota kule; xaa yannara kayinni haaro loosu garinna tantanonni laashshaano interpirayzooti dhuka lossate loonsanni hee’noonni yino.
Jajjabba industurrara kaimu shiimmaaddanna mereerima interpirayzootaati yinohu kalaa Birru; xaa yannarano mootimma handaaraho jawa illacha tugatenni gobbankera albillicho hasiissannoseti jajjabba industurrara kaajjado safo tugate laashshaano interpirayzoota deerru deerrunkunni irkisate loossa kaajjinshe loonsanni hee’noonnita huwachishino.
Konnirano deerru deerrunkunni afantannore laashshaano industurra deerra woyyaawino deerrira reekkantanno gede uurrinsha qoqqowubbatenna hattono latishshunna hallanya baankuwa ledo halante loossannotanna laashshaano uurrishuwara hasiisannowa womaashshu liqoo injonna safote latishshuwano garunni wonshinanni garinni injeessatenna irkisate loossano yawo adhite loossanni afantannota coyi’rino.
Xaa yannarano albaanni loossa hanaffe mereeronko agurtinorenna woyyaawino deerrira reekkama dandiitinokkire hattono loosonsa suffe afantannore bandanni hee’noonniha ikkanna; laashshaano interpirayzootino wonsha hasiissannonsare garunni wonshitannonna mootimmatewiinni hasiissanno irko assinanninsa garinni loonsanni hee’noonnitano hattonni.
Konni garinnino soorrote mootimma gobbankera albillicho hasiissannota kaajjadda industurra halashshate kaima ikkitinore laashshaano interpirayzoota garunni irkisa hasiissannotano lede egensiisino.
Baxxinohunnino looso hasidhanno qansooti laashshaano interpirayzooti handaarinni bobbakke loosu kaayyo horonsi’raano ikkanna gobbansarano agarranninsa qeecha fula hasiissannotano amadisiise sokkasi saysino.
Amsaalu Felleqe
Bakkalcho Ammajje 10, 2014 M.D
